„კვერცხი ფაბერჟე“
საჭირო ინგრედიენტები: 10 ცალი კვერცხის ნაჭუჭი, 20 გრამი ჟელატინი, 2 ჭიქა ქათმის ბულიონი, 200 გრამი ლორი, 0,5 ქილა დაკონსერვებული სიმინდის მარცვალი ან მწვანე ბარდა, 2 ცალი ბულგარული წიწაკა (წითელი და მწვანე), ცოტა ოხრახუშისა და კამის ფოთლები, სალათის მწვანე ფურცლები – გასაფორმებლად, მარილი – გემოვნებით.
მომზადების წესი: მოხარშეთ ქათმის ბულიონი, დაუმატეთ მარილი. ჟელატინი ჩაალბეთ გაციებულ ბულიონში და გააჩერეთ 1-2 საათი, გაღვივებამდე, შემდეგ კი დადგით ცეცხლზე, სანამ ჟელატინი მთლიანად გადნება, მაგრამ, არ უნდა ადუღდეს. კვერცხი გარეცხეთ, გაამშრალეთ, ძირი გაუხვრიტეთ დანის წვერით, დაახლოებით 2 სანტიმეტრამდე. შიგთავსი გამოადინეთ. ცარიელი კვერცხის ნაჭუჭები გარეცხეთ სოდიან ხსნარში და გაავლეთ გამდინარე წყალში (კვერცხის ნაჭუჭთან უფრო მოხერხებულად რომ იმუშაოთ, ჩადეთ სპეციალურ კვერცხის ფორმაში). ლორი დაჭერით ნაჭრებად, მწვანე ბარდა ან სიმინდის მარცვლები დაწურეთ. ბულგარული წიწაკა დაჭერით კუბიკებად. კვერცხის ნაჭუჭის ფსკერზე ჩააფინეთ ბულგარული წიწაკის ნაჭრები და კამის ფოთლები, ზემოდან კი რიგრიგობით მოათავსეთ: ლორი, სიმინდის მარცვლები, წიწაკა, ოხრახუშის ფოთლები და ამგვარად ამოავსეთ კვერცხის ნაჭუჭის თავისუფალი სივრცე, ბოლოს ჩაასხით ჟელატინიანი ბულიონი. კვერცხები დადგით გრილ ადგილას და აცადეთ შესქელება. სუფრაზე მიტანამდე კვერცხის შიგთავსს მოაშორეთ ნაჭუჭი და გადმოიღეთ თეფშზე დალაგებულ სალათის ფურცლებზე.