„სელინი“ მსოფლიოში ერთ-ერთი ყველაზე ცნობილი მოდის სახლია, რომელიც სხვადასხვა ქვეყანაში ფრანგულ, საუკეთესო ხარისხის სამოსს, ფეხსაცმელს, ჩანთებსა და აქსესუარებს „პრეტ-ა-პორტე დე ლუქს“ სტილში აწვდის. ფეხსაცმლის ჩვეულებრივი მაღაზია წარმოუდგენელი პოპულარობით სარგებლობდა მთელ პარიზში, ბრენდის მსოფლიო აღიარება კი გასული საუკუნის სამოციან წლებში დაიწყო, როდესაც „სელინის“ დიზაინერებმა ქალის ფეხსაცმლის პირველი კოლექცია წარმოადგინეს. ბრენდის ეგრეთ წოდებული სავიზიტო ბარათი პონის ტყავია. დღემდე არ იქმნება არც ერთი კოლექცია ისე, რომ ფეხსაცმელში ან ჩანთაში ამ პატარა ცხოველის ტყავი არ იყოს გამოყენებული. ამის გამო „სელინი“ ხშირად ხვდებოდა ცხოველთა და გარემოს დამცველების კრიტიკისა და ლანძღვის ობიექტი. თუმცა, მოდის სახლს ნატურალური ტყავისა და ბეწვის გამოყენებაზე უარი მაინც არასდროს უთქვამს.

„სელინის“ კოლექციები ყოველთვის კოსმოპოლიტურია, მაგრამ, ამავდროულად, ყოველთვის გამოხატავს ფრანგულ კლასიკურ ფორმებს, საფრანგეთის სულს. „სელინის“ დიზაინერები წარმოუდგენლად ლამაზად ახდენენ სექსუალურობისა და პრაქტიკულობის გონივრულ შეხამებას, გლამურსა და ფრანგულ შიკს. ბრენდის კოლექციები განკუთვნილია ენერგიული, საკუთარ თავში დარწმუნებული ქალებისთვის, რომლებიც თავისუფალნი არიან სტერეოტიპებისა და კომფორმიზმისგან. მოდის სახლში ნიჭიერი ამერიკელი დიზაინერის, მაიკლ კორსის მისვლის შემდეგ, „სელინიმ“ მამაკაცის ხაზიც გამოუშვა, რომელიც გვთავაზობდა კლასიკურ სამოსსა და აქსესუარებს ნამდვილი მამაკაცებისთვის. როგორც ქალს, ისე მამაკაცს, „სელინი“ საშუალებას აძლევს, შეიმოსოს კომფორტულად და მოხერხებულად და, ამავდროულად, შეინარჩუნოს წარმოუდგენელი ელეგანტურობა და ინდივიდუალური სტილი.



2010 წლის „სელინის“ გაზაფხული-ზაფხულის კოლექცია წარმოადგინა პოებ ფილომ – დიზაინერმა, რომელმაც ზუსტად იცის, რა სჭირდება ქალს. ოთხი წლის განმავლობაში ის „ქლოესთან“ მუშაობდა, სადაც საოცარი სილამაზის საქორწილო კაბებს ქმნიდა. ოთხი წლის შემდეგ კი იგი სულ სხვა მოდის სახლშია, განსხვავებული მიმართულებებითა და ტენდენციებით.

„ახლა ჩემი ქალი უფრო სუფთა და ნაზია, გათავისუფლებულია ზედმეტი დეტალებისგან. ახლა ქალს უფრო მეტი ძალაუფლება აქვს და უფრო ძლიერიცაა. ამის საშუალებას მას თანამედროვე მინიმალიზმი აძლევს,“ – ამბობს პოებ ფილო.

მარტივი, სპორტული ელემენტებით გაჯერებული, მაგრამ, ამავდროულად, ძალიან მდიდრული სამოსი „სელინისგან“ მშვენივრად ეხამება გაზაფხულსა და ზაფხულს, განსაკუთრებით მაშინ, თუ ქალს გრძელვადიანი შვებულება არ აქვს და მთელ ზაფხულს ქალაქში, ძალიან საქმიანად ატარებს. კაბების სიგრძე საგრძნობლად შემცირდა, მაგრამ ელეგანტურობას მაინც არ კარგავს ლამაზი სილუეტი, რომელიც ხაზს უსვამს სხეულის გამობურცულ ნაწილებს, ტყავის ელემენტებითაა გაფორმებული და შენარჩუნებული აქვს სიმკაცრე.

ამ სეზონზე ფერებიდან აქტუალურია შავი, ხორცისფერი და რძისფერი. მოდის კრიტიკოსებს განსაკუთრებით გაუკვირდათ ფილოს მიერ სტანდარტული შემოსაცმლის წარმოდგენა, რომელიც სახელოებშემორღვეულ ლაბადას ჰგავდა.

ასე რომ, „სელინის“ ტენდენციები ძალიან პრაქტიკულია და ჩვენს ნებისმიერ მოქალაქეს იოლად მიუწვდება მასზე ხელი.