ოთხ თვეში არგენტინაში ოფიციალურად კიდევ ერთი სპორტული ოჯახი შეიქმნება – ჩოგბურთელი ჰისელა დულკო და მადრიდის „რეალის” არგენტინელი ლეგიონერი ფერნანდო გაგო ჯვრისწერისთვის ემზადებიან. საინტერესოა, რომ ქორწილამდე სპორტსმენებს თავიანთი ქვეყნის ნაკრების ღირსების დაცვა მოუწევთ, ჰისელა არგენტინის ჩოგბურთელ ქალთა ნაკრებში იაპონელებს დაუპირისპირდება, ხოლო გაგო „კოპა ამერიკაზე” დაიცავს ორგზის მსოფლიოს ჩემპიონების ღირსებას. ფერნანდოს და ჰისელას რომანი სულ რამდენიმე თვეა, რაც დაიწყო. მანამდე ჰისელას „ბოიფრენდები“ ჩოგბურთელები ფერნანდო ვერდასკო და ფერნანდო გონსალესი იყვნენ, ხოლო გაგო არგენტინელ მსახიობსა და მოდელს – მიკაელ ვასკესს ხვდებოდა. საინტერესოა, რომ ჰისელას, როგორც ჩანს, გართულება აქვს მამაკაცის სახელზე – ფერნანდო.