უცხოეთიდან სულ ცოტა ხნის წინ ჩამოსულმა ახალგაზრდა ბიჭებმა ჩამოაყალიბეს ივენთ კომპანია „ივენთ ლაბორატორი”, რომელიც ძალიან სერიოზული ღონისძიებებითა და წვეულებებით აპირებს ქართველი საკლუბო ცხოვრების მოყვარულების გართობას. მანამდე კი „ივენთ ლაბორატორი“ კლუბ „ბამბა რუმსში” ცნობილი ადამიანების საღამოებს აწყობს. 26 მარტს „ბამბა რუმსის” შესასვლელთან ძალიან დიდი რიგი იდგა. ფეისკონტროლმა გართობის უამრავი მსურველი გარეთ დატოვა, ისინი კი, ვინც ასაკსა და სოციალურ სტატუსს შეეფერებოდა – კლუბში მოხვდნენ. იმ დღეს „ბამბაში” „მის საქართველო“ – დეა არაყიშვილი „მიქსავდა”. დეა ერთი კვირის განმავლობაში ემზადებოდა საღამოსთვის, რათა ხარისხიანი და რიტმული მუსიკით გაეხალისებინა კლუბში მისული სტუმრები. „მის საქართველომ“ და მთავარმა დიჯეიმ, გიგიტომ, მუსიკა ერთად აარჩიეს. დეა არაყიშვილი არაჩვეულებრივი დიჯეი აღმოჩნდა და სტუმრები ძალიან მალე ისე „დაქოქა”, ერთწუთიანი ჩავარდნაც არ ყოფილა.