დიეტა, რომელსაც გთავაზობთ, ზარმაცებს, შესაძლოა, ძნელად შესასრულებლად მოეჩვენოთ, მაგრამ, სინამდვილეში, არც ისე რთულადაა საქმე. ამ დიეტის მთავარი პრინციპი, ცხადია, რაციონის პარალელურად არის მისი რეჟიმი და შესრულების ტექნიკა, ანუ:

1. ყველა საკვები უნდა იყოს ნაკლებკალორიული;

2. დღის განმავლობაში უნდა მიირთვათ 4-5-ჯერ;

3. თითოეული კერძის რაოდენობა არ უნდა აღემატებოდეს 150-200 გრამს;

4. მთლიანად უნდა გამორიცხოთ ტკბილეული (დასაშვებია მხოლოდ დღეში 1 ჩაის კოვზი თაფლი, ჩაისთან ან ყავასთან ერთად) და ცომეული (პურის ნაცვლად უნდა მიირთვათ თითო ცალი „ხლებცი“ ყოველი კვების შემდეგ);

5. უნდა დალიოთ დღეში 1,5-2 ლიტრი სითხე: ჩვეულებრივი სასმელი წყალი, გაზგასული მინერალური წყალი, ჩაი, ყავა, ხილისა და ბოსტნეულის ახალგამოწურული (უშაქრო და უმარილო) წვენები;

6. ყოველი დღის ბოლო კვება უნდა მოხდეს 19 საათზე და შედგებოდეს ტომატის წვენისგან (1 სადილის კოვზი ტომატ-პასტა გახსენით 1 ჩაის ჭიქა წყალში და უმარილოდ დალიეთ);

7. თითოეული ლუკმა დაღეჭეთ 20-25-ჯერ, სითხე კი დალიეთ მაქსიმალურად პატარა ყლუპებით;

8. და, რაც მთავარია: შეეცადეთ, საკვები მიირთვათ ფეხზე მდგარმა; მერე 5 წუთით ჩამოჯექით, ამის შემდეგ კი 10 წუთი დაუთმეთ ვარჯიშს (ვარჯიში უნდა გააკეთოთ ყოველი კვების შემდეგ): ადგილზე ხტომა, ბუქნები ან ნებისმიერი გამაჯანსაღებელი ვარჯიში, აჭიმვების გარდა.

ეს დიეტა განსაკუთრებით საინტერესოა მათთვის, ვისაც უცბად მომატებული კილოგრამების სწრაფად დაკლება სურს.