ამ ბოლო დროს პრესაში გავრცელდა ინფორმაცია, რომ ქეთი მელუა, ჯანმრთელობის მდგომარეობის გაუარესების გამო, დროებით სცენას ჩამოშორდა. მან ჩაშალა ახალი ალბომის – „ზი ჰაუს” სარეკლამო მსოფლიო ტურნე. მართალია, ქეთი ჟურნალისტებთან იშვიათად ჩნდება, მაგრამ ამ შემთხვევაში, მან მედიის წარმომადგენლებს ტაიმ-აუტის მიზეზი აუხსნა და თქვა, რომ მისი ჯანმრთელობისთვის აუცილებელია დასვენება. დროა, თავს სერიოზულად მივხედოო, – ამბობს 26 წლის მომღერალი. ის დანანებით აღნიშნავს, რომ ძალიან უჭირს სიმღერის გარეშე ყოფნა, მაგრამ ამ ეტაპზე ეს ყველაზე მნიშვნელოვანია. ქეთი უკვე ჰოსპიტალიზებულია და რამდენიმე კვირაში გეგმავს სცენაზე დაბრუნებას, დაახლოებით, ერთ თვეში კი, მისი ტურნე დაიწყება.