12 მარტს, „რედ ბულმა” თბილისის მერიის თასის ფარგლებში, პირველად საქართველოში, გამართა შეჯიბრება სახელწოდებით – „რედ ბულ ჰოუმ რან“! გუდაურში ორმოცდაათზე მეტი მოთხილამურე და ოცდაათზე მეტი სნოუბორდისტი, მათ შორის – ბევრი უცხოელიც, საკუთარი შესაძლებლობების გამოსავლენად და 500-ლარიანი ჩეკის მისაღებად შეიკრიბნენ, რომლითაც მაღაზია „სნოუ არენაში” საჩუქრებს შეარჩევენ. ყველას შეეძლო, ეყურებინა თუ როგორ ცდილობდნენ, მონაწილეები გადამწყვეტი დისტანციის დაძლევას და ფინიშის ხაზის გადაკვეთას. გამარჯვებულები მაყურებლის თვალწინ გამოვლინდნენ. საინტერესო იყო, რომ სნოუბორდის მიმდევარ ქალბატონებს შორის, გამარჯვებული უკრაინელი გახდა. ერთი სიტყვით, შეჯიბრებამ საერთაშორისო ხასიათი მიიღო.

ღონისძიების კულმინაცია უკვე საღამოს იყო, როდესაც თბილისის მერმა, გიგი უგულავამ თავად დააჯილდოვა გამარჯვებულები. გადასცა მათ მერიის თასი და 500-ლარიანი კუპონები. დაჯილდოების ცერემონია გლინტვეინისა და ბარმენთა ცეცხლოვანი შოუს თანხლებით მიდიოდა. დაუვიწყარი იყო ფოიერვერკი და დიჯეის კოსმიური მუსიკა, რომელიც დაჯილდოების ცერემონიალს მოჰყვა.