„მანჩესტერ იუნაიტედის” ვარსკვლავის უეინ რუნის გოლი, რომელიც მან „მანჩესტერ სიტის” კარში ეფექტური, მაკრატელა დარტყმით გაიტანა, ექსპერტების აზრით, ყველა დროის ყველაზე ლამაზ გოლად უნდა დასახელდეს. მაგალითად, შოტლანდიელი ექსფეხბურთელის, ჯონ უორკის აზრით, უეინ რუნის გოლი ნამდვილი შედევრია, რომელსაც პელეს განთქმული მაკრატელა დარტყმაც კი ვერ შეედრება ფილმში „გაქცევა გამარჯვებისკენ” რომ განახორციელა ფეხბურთის მეფემ. შეგახსენებთ, რომ უორკმა, პელემ და ფეხბურთის სხვა ვარსკვლავებმა ფილმში „გაქცევა გამარჯვებისკენ” ნაცისტების წინააღმდეგ ჩატარებული ლეგენდარული მატჩი გააცოცხლეს დიდ ეკრანზე. ერთ-ერთ ეპიზოდში ბობი მურის ჩაწოდების შემდეგ, პელემ პირველივე დუბლზე მოახერხა ეფექტური გოლის გატანა.