კითხვა: რამდენიმე თვეა, ტანზე გამიჩნდა გამონაყარი. რა უნდა იყოს ამის მიზეზი?

პასუხი: მიზეზი შეიძლება, რამდენიმე იყოს: ოფლიანობა, სინთეტიკური ქსოვილის ტანსაცმელი, ნივთიერებათა ცვლის დარღვევა, ალერგია და ასე შემდეგ. ყოველი დაბანის შემდეგ ტანი გაიწმინდეთ დამატენიანებელი ლოსიონით და დაიყარეთ ტალკი.

კითხვა: როგორ შევინარჩუნო ტუჩის „ბლესკის” ეფექტი ხანგრძლივად?

პასუხი: „ბლესკის” წასმამდე ტუჩები დაიტენიანეთ ბალზამით, შემდეგ წაისვით ტუჩის ფანქარი, რომელიც, სასურველია, „ბლესკის” ფერის იყოს და მხოლოდ ამის შემდეგ წაისვით „ბლესკი”.

კითხვა: ხშირად მექერცლება ტუჩები, რას მირჩევთ?

პასუხი: უმრავლეს შემთხვევაში, თუ არ ჩავთვლით სიცივეს, ტუჩების სიმშრალე და აქერცვლა გამოწვეულია A და E ვიტამინების ნაკლებობით. ამიტომ, შეეცადეთ, თქვენი კვების რაციონში ჩართოთ მცენარეული ზეთი. გარდა ამისა, სახლიდან გასვლისას და საღამოს, ძილის წინ, აუცილებლად წაისვით მკვებავი ბალზამი ან ჰიგიენური პომადა.

კითხვა: პერიოდულად მიჩნდება ქერტლი. როგორ მოვიქცე?

პასუხი: თუ არ გსურთ ქიმიური საშუალებების გამოყენება, ყოველ მეორე საღამოს, თავის დაბანამდე ორი-სამი საათით ადრე, თმის ძირებში შეიზილეთ ჭინჭრის ნაყენი, შემდეგ კი ჩამოიბანეთ ათქვეფილი კვერცხის გულით და გვირილის ნახარშით. რამდენიმე დაბანის შემდეგ ქერტლი აღარ შეგაწუხებთ.

კითხვა: რა მიზნით გამოიყენება გვირილა კოსმეტიკაში?

პასუხი: გვირილას კოსმეტოლოგიაში უამრავი დანიშნულება აქვს:

1) თუ გარუჯვისას კანი აგიჭრელდათ, გაიწმინდეთ გვირილის ნაყენით დილა-საღამოს და სიჭრელე გაქრება.

2) თუ გაქვთ მგრძნობიარე კანი, თქვენს მკვებავს შეაზილეთ 2 წვეთი გვირილის ეთერზეთი და წაისვით ძილის წინ.

3) თუ ცხიმიანი კანი გაქვთ, დილა-საღამოს გაიწმინდეთ გვირილის ნაყენით და კანის პრიალი აღარ შეგაწუხებთ. ასევე, გვირილა ავიწროებს ფორებს.

4) თუ კანი ხშირად გიშრებათ, გამოიყენეთ მკვებავი, რომელშიც შედის გვირილის ზეთი.

კითხვა: ვარ 55 წლის. მოგეხსენებათ, ამ ასაკში ყველა ქალს უნდა, თუნდაც ათი წლით ახალგაზრდად გამოიყურებოდეს. როგორ უნდა მოვუარო თავს სახლის პირობებში და რას უნდა მივაქციო განსაკუთრებული ყურადღება?

პასუხი: შეძლებისდაგვარად, მოკლედ მოგახსენებთ. საჭიროა: მინიმუმ 7-8 საათი ძილი; ანტიასაკობრივი კოსმეტიკისა და ვიტამინების კომპლექსური გამოყენება; სამი ელემენტი, რომელსაც შეუძლია, გათქვას ქალის ასაკი: ესაა თმა, კბილები და კანი. ამიტომ, მათ განსაკუთრებული ყურადღება სჭირდება; და, კიდევ – ვარჯიში, წყლის პროცედურები და გეგმაზომიერი კვება. თუ ამ რჩევებს გაითვალისწინებთ და მაქსიმალურად შეასრულებთ, ყოველ 3-4 თვეში თქვენს ასაკს თითო წელი მოაკლდება და ჯანმრთელობაც შესამჩნევად გაგიუმჯობესდებათ.