ჩინეთის დედაქალაქის, პეკინის ხელისუფლებამ საცხოვრებელი სახლების ყიდვაზე კონტროლი გაამკაცრა. პეკინის მცხოვრებთ, რომლებსაც უკვე აქვთ ორი ან მეტი ბინა დედაქალაქში, ახალი ბინის ყიდვა ეკრძალებათ. დედაქალაქის სტუმრებს ამიერიდან პეკინში მხოლოდ ერთი ბინის ყიდვის უფლება მიეცათ. ბოლო პერიოდში ჩინეთში საცხოვრებელ ფართზე ფასების გაზრდა უძრავი ქონების ბაზარზე სპეკულაციებთან იყო დაკავშირებული, რის გამოც, მთავრობა იძულებული გახდა, ბინების გაყიდვაზე გარკვეული კონტროლი დაეწესებინა. კერძოდ, მეორე ან მესამე ბინის მყიდველთათვის ბანკიდან კრედიტის მიღების წესები საგრძნობლად გამკაცრდა. ამ ეტაპზე ჩინეთის უძრავი ქონების ბაზარზე ფასები მეტ-ნაკლებად სტაბილურია. ახლა ექსპერტები იმაზე მსჯელობენ, მოახერხებს თუ არა ხელისუფლება საბინაო ფართებზე ფასების შემცირებას. ჩინეთის ეროვნული სტატისტიკის სამმართველოს მონაცემებით, 2011 წლის იანვარში ბინების ფასი 6,8 პროცენტით გაიზარდა, ბინების დაქირავების ღირებულება კი – საშუალოდ 7,1 პროცენტით.