„მანჩესტერ იუნაიტედის” გულშემატკივრებმა ინტერნეტის საშუალებით ჩაატარეს გამოკითხვა და გამოავლინეს ყველა დროის საუკეთესო ფეხბურთელი, რომელსაც ოდესმე უთამაშია „მანკუნიანელთა” მაისურით. ასეთად კი ქომაგებმა უბერებელი უელსელი, ლეგენდარული 11 ნომერი, რაიან გიგზი აირჩიეს. გიგზის სიდიადეში რომ დარწმუნდეთ, საკმარისია, გაეცნოთ მისი კარიერის მცირე მიმოხილვას: ინგლისის 11-გზის ჩემპიონი, ორგზის ჩემპიონთა ლიგის გამარჯვებული, რეკორდსმენი ჩატარებული მატჩებით. აღსანიშნავია, რომ გიგზმა გამოკითხვაში კლუბის სხვა ლეგენდებს – ერიკ კანტონას, ჯორჯ ბესტსა და ბრაიან რობსონს აჯობა.