კითხვა: შეიძლება თუ არა „ნიმესილისა“ და „კოლდრექსის“ პარალელურად მიღება?

პასუხი: შეიძლება, თუმცა, უმჯობესია, რჩევისთვის მიმართოთ ოჯახის ექიმს.

კითხვა: როგორ მოქმედებს ლამბლიები ორსულობაზე?

პასუხი: ლამბლიოზი ორსულობაზე და მშობიარობაზე უარყოფითად არ მოქმედებს. იმკურნალეთ მშობიარობის შემდეგ.

კითხვა: შეიძლება თუ არა ორსულობის დროს რეტინოლის შემცველი კრემის გამოყენება?

პასუხი: რეტინოლის შემცველი კრემის მოხმარება ორსულობის დროს არ შეიძლება. ის შეიცავს დიდი რაოდენობით A ვიტამინს, რომელიც სახიფათოა ნაყოფის განვითარებისთვის.

კითხვა: რა არის ადენოიდები და როგორია მათი მკურნალობა?

პასუხი: ადენოიდები – ცხვირის ნუშურას გადიდებაა. საშიშროება მდგომარეობს იმაში, რომ ადამიანი ცხვირის მაგივრად სუნთქავს პირით, რაც ხშირად ხდება სახის ძვლების დეფორმაციის, ხოლო ზამთრის პერიოდში – ანგინებისა და მწვავე რესპირატორული ინფექციების მიზეზი. მკურნალობა: მედიკამენტები, ლაზეროთერაპია ან ქირურგიული ჩარევა, რაც უფრო ეფექტურია და უკეთეს შედეგს იძლევა.

კითხვა: არსებობს თუ არა ჰეპატიტით დაავადების საშიშროება ფიზიკური კონტაქტის დროს (ხელის ჩამორთმევა და სხვა)?

პასუხი: ვირუსული A, B, C, D, E ჰეპატიტები ფიზიკური კონტაქტით არ გადადის.

კითხვა: მაქვს ბულემია. შემწევს ძალა, თვითონ შევებრძოლო ამ სენს, ოღონდ, მითხარით, როგორ უნდა მოვიქცე?

პასუხი: აუცილებელია, რაც შეიძლება მალე მიმართოთ სპეციალისტს. დამოუკიდებლად შებრძოლება ამ დაავადებასთან ძალიან რთულია. ბულემიას მკურნალობენ ფსიქიატრები.

კითხვა: კისერზე და მხრებზე გამიჩნდა თეთრი ლაქები, რომლებიც არ მაწუხებს. რა შეიძლება იყოს ეს?

პასუხი: ესაა ვიტილიგო – კანის პიგმენტაციის დარღვევა, კოსმეტიკური დეფექტი. გარანტირებული მკურნალობა არ არსებობს. მკურნალობასაც აზრი აქვს მხოლოდ კოსმეტიკური თვალსაზრისით, ექიმ-კოსმეტოლოგთან.

კითხვა: გულზე ოპერაციის შემდეგ შემიმცირდა სასქესო ორგანო ფუნქციის დარღვევის გარეშე. შეიძლება ეს ასაკის ბრალი იყოს? ვარ 58 წლის.

პასუხი: ზომის შემცირებაზე გულის ოპერაცია გავლენას არ ახდენს. ასაკის მატებასთან ერთად ხდება ჰორმონალური ფონის დაქვეითება, რაც ზოგ შემთხვევაში იწვევს ზომის უმნიშვნელო შემცირებას.

კითხვა: შეიძლება თუ არა მასტოპათიის მკურნალობა ჰირუდოთერაპიით (წურბელებით)?

პასუხი: მასტოპათიას ჰირუდოთერაპიით არ მკურნალობენ.

კითხვა: მირჩიეთ, როგორ მოვიშორო პაპილომა?

პასუხი: პაპილომის მოშორება შესაძლებელია კრიოდესტრუქციით, ელექტროკოაგულაციით ან ლაზერით. ოპტიმალურ მეთოდს კი ექიმი-დერმატოლოგი გირჩევთ.

კითხვა: სახიფათოა თუ არა დღეში 300 გრამი შოკოლადის ჭამა? შეიძლება, ეს გახდეს შაქრიანი დიაბეტის მიზეზი?

პასუხი: რა თქმა უნდა, ასეთი რაოდენობით ტკბილეულის მიღება მავნეა ორგანიზმისთვის, თუმცა, შეიძლება დიაბეტი არ გამოიწვიოს. ამისთვის მნიშვნელოვანია გენეტიკური დატვირთვა. ჯობია, ბედს ნუ გამოცდით.

რუბრიკას უძღვება ოჯახის ექიმი