როგორც იცით, თბილისში ყოველწლიურად, სააგენტო „ლეონის” ორგანიზებით, ტარდება კონკურსი „მის ინტერნეიშენალი”, რომლის გამარჯვებულიც ამავე სახელწოდების მსოფლიო კონკურსზე მიემგზავრება. ამ ზაფხულს კონკურსი მსოფლიოს ჩემპიონატის გამო „მსოფლიო თასის ლამაზმანის” სახელს ატარებდა. მისი გამარჯვებული – მოდელი თაკო ფილიშვილი გახდა, რომელიც წლის ბოლოს ჩინეთში, შან-ხაიში გაემგზავრა. სამწუხაროდ, ჩვენი კონკურსანტი საპრიზო ადგილზე ვერ გავიდა. როგორც თავად თქვა, უკვე შვიდი წელია, ამ კონკურსს თანმიმდევრობით ხან ვენესუელის და ხან მექსიკის წარმომადგენელი იგებს. წელსაც ტრადიცია არ დაირღვა და „მის ინტერნეიშენალის“ ტიტული „მის ვენესუელამ“ აიღო. ქართველი წარმომადგენელი იქიდან საინტერესო შემოთავაზებებით დაბრუნდა. თუმცა, გარკვეული მიზეზების გამო, კარიერის უცხოეთში გაგრძელება ვერ შეძლო. როგორც თაკომ გვითხრა, ამ კონკურსზე ამ წლის წარმომადგენლის შესარჩევად, თბილისში „მის უკრაინა“, „მის საბერძნეთი“, „მის ბელორუსია“ ჩამოდიან და სწორედ ისინი იქნებიან ჟიურის წევრები.