“NEW FACE„ ფართი “ბამბა რუმსში„
სულ რამდენიმე დღის წინ, კლუბ „ბამბა რუმსში” ახალი სამოდელო სააგენტოს „ნიუ ფეისის” პრეზენტაცია გლამურულად გაიმართა. მედიის წარმომადგენლები, ცნობილი ადამიანები და მოდის სფეროში მოღვაწენი შეიკრიბნენ, რათა ის გოგონები ენახათ, რომლებიც ნათია მაქაცარიასა და ქეთი ჯიშიაშვილის ახალი სააგენტოს მოდელები გახდნენ. საღამოს დიჯეი რემბო აფორმებდა, გოგონებმა ახალბედა დიზაინერის, ანი მაისურაძის კოლექცია საკმაოდ პროფესიონალურად წარმოადგინეს. როგორც სააგენტოს ხელმძღვანელებმა ჩვენთან საუბარში აღნიშნეს, გოგონებთან მუშაობა მხოლოდ დეფილეთი არ შემოიფარგლება. სააგენტოში კვალიფიციური სპეციალისტები ასწავლიან მათ ცეკვას, ფოტო და ვიდეოკამერასთან მუშაობას, ვიზაჟს, ეთიკას, ესთეტიკას, ფსიქოლოგიას. სულ ათ საგანს, რომელიც მოდელს ფიზიკურად გაალამაზებს და დახვეწს. პრეზენტაციის შემდეგ სტუმრებმა გვიანობამდე იმხიარულეს რემბოს მუსიკაზე.