„ვალუტების ომი“, რომელიც ჯერ კიდევ 2010 წელს დაიწყო, 2011 წელს გლობალურ სავაჭრო ომში გადაიზრდება. ამის შესახებ „ფაინენშლ თაიმსთან“ ინტერვიუში ბრალიზიის ფინანსთა მინისტრმა – გვიდო მანტეგამ განაცხადა. ბრაზილია ყველაზე მეტად დაზარალდა საკუთარი ვალუტის კურსის გამყარების გამო. ბოლო რვა წლის განმავლობაში ბრალიზიური რეალი ამერიკულ დოლართან მიმართებაში ყველაზე მეტად მყარდებოდა. 2009 წელს ის 2 პროცენტით გამყარდა, ხოლო 2010 წელს – 4,6 პროცენტით. შედეგად ბრაზილიის სავაჭრო პროფიციტი მინიმუმამდე შემცირდა. რეალის მაღალი კურსი აწყობს იმპორტიორებს და ხელს არ აძლევს ექსპორტიორებს. აღსანიშნავია, რომ ტერმინი „ვალუტების ომი“ შარშან სწორედ ბრაზილიის ფინანსთა მინისტრმა გაახმაურა. ეს ტერმინი მან პირველად 2010 წლის სექტემბერში ახსენა. „ვალუტების ომი“ გამოწვეულია სავაჭრო პროფიციტის ზრდით. მინისტრმა ომი 2011 წელს ახალ კონტექსტში – ავსტრალიური დოლარისა და შვეიცარიული ფრანკის განმტკიცების შემდეგ ახსენა. ბრაზილიის, ჩილესა და პერუს ხელისუფლებები აქტიურად ერევიან 2011 წელს ფინანსურ ბაზრებზე მიმდინარე ოპერაციებში, რათა ხელოვნურად შეუშალონ ხელი ადგილობრივი ვალუტების ზედმეტად განმტკიცებას.