კიდევ ერთი ახალი კლუბი თბილისში
გასულ კვირას მარჯანიშვილის ქუჩაზე საკმაოდ პომპეზურად გაიხსნა ახალი ღამის კლუბი „ოთახი”, რომლის ერთ-ერთი თანამფლობელი, როგორც აღმოჩნდა, ყოფილი „ამტანი”, ლეკინოა. გახსნის საღამოს, ქართველმა შემსრულებლებმა ესტონეთის ელჩთან ერთად, ღამის 3 საათამდე, არაჩვეულებრივად მოილხინეს და აღნიშნეს კიდეც, რომ ასე კარგად დიდი ხანია, არ „უტუსოვკიათ”. სცენაზე ასულმა ანრი ჯოხაძემ ჩვეული იუმორით გაახალისა შეკრებილი საზოგადოება, კლუბის ახალგაზრდა მფლობელებს წარმატება უსურვა და, როგორც უნდა გაგიკვირდეთ, წყევლაც არ დაუშურებია დიჯეი გიგასთვის, რომელიც საკმაოდ ხალისიანად უძღვებოდა საღამოს და ისიც დააყოლა „სცენას ახლავე თუ არ დატოვებ, არ გეგონოს, ჩემმა ძუძუებმა დაგლოცონო”. ამის შემდეგ ანრიმ გლორია გეინორის „აი ვილ სურვაივ” იმღერა, რომელზეც აქტიურად იცეკვეს ესტონეთის საელჩოს წარმომადგენლებმა. ანრის გამოსვლას იუმორით არც „დები ღლონტები“ ჩამოუვარდებოდნენ, რამაც საღამო უფრო მრავალფეროვანი და საინტერესო გახადა.