2010 წელი განსაკუთრებული იყო აფრიკისთვის, შავმა კონტინენტმა, პირველად ისტორიაში, „ფიფას“ მსოფლიოს ჩემპიონატს უმასპინძლა, ხოლო განის ნაკრებმა კამერუნის 1990 წლის ტრიუმფი გაიმეორა და სულ ცოტა დააკლდა, რომ ნახევარფინალში ეთამაშა. საფეხბურთო წლის შემაჯამებელ მოვლენად კი აფრიკაში „წლის ფეხბურთელის“ ლაურეატის გამოცხადება გახდა. საუკეთესო აფრიკელი ფეხბურთელის ჯილდო, მეოთხედ და სარეკორდოდ, მილანის „ინტერისა“ და კამერუნის ნაკრების ფორვარდმა სამუელ ეტოომ მიიღო. განვლილი წელი ფეხბურთელის კარიერაში წარმატებული გამოდგა – კლუბთან ერთად, მან ყველა ევროპული ტიტული მოიპოვა, ხოლო ნაკრებთან ერთად, სამხრეთ აფრიკის სტადიონებზე იასპარეზა. გამოკითხვაში ეტოომ კოტდივუარელ დიდიე დროგბას და განელ ასამოა გიანს აჯობა.