მიჩიგანის ორი გუნდის შეხვედრისას, 113 411 ჰოკეის მოყვარული დაესწრო. ეს ორივე გუნდი სტუდენტურ ლიგაში ასპარეზობს. „მიჩიგანის უნივერსიტეტის“ გუნდმა დამაჯერებელი ანგარიშით, 5:0 დაამარცხა „მიჩიგანის შტატის“ გუნდი.

ჰოკეის მოედანი განათავსეს ამერიკული ფეხბურთის მოედანზე. რეკორდის დამყარების შესახებ საზეიმოდ გამოაცხადეს მესამე პერიოდში.

„ალბათ, ყველას ამ მომენტში გააჟრჟოლა, – გამოტყდა თამაშის შემდეგ „მიჩიგანის უნივერსიტეტის“ გუნდის თავდამსხმელი, კარლ ჰაგელინი, რომელმაც ამ მატჩში ორი შაიბა შეაგდო, – სტადიონზე წარმოუდგენელი ამბავი ტრიალებდა. ალბათ, მატჩზე ყველაზე ხმაურიანმა გულშემატკივარმა მოიყარა თავი“.

ღონისძიებას გინესის რეკორდების წიგნის წარმომადგენლები ესწრებოდნენ, რომლებმაც აღიარეს რეკორდი.

გავიხსენოთ, ჰოკეის მატჩზე დასწრების წინა რეკორდული მაჩვენებელი მსოფლიოს უკანასკნელ ჩემპიონატზე, გერმანიაში დაფიქსირდა: გერმანიის ნაკრებისა და ამერიკის შეერთებული შტატების ნაკრების მატჩს 77 803 გულშემატკივარი დაესწრო.