აზიური ქალაქები ევროპულ და ამერიკულ მეგაპოლისებზე ადრე გამოდიან კრიზისიდან, აღნიშნულია ლონდონის ეკონომიკური სკოლის, „ბრუკინგს ინსტიტუტისა“ და „დოიჩე ბანკის“ მიერ ჩატარებულ ერთობლივ გამოკვლევაში. ექსპერტებმა შეადარეს მსოფლიოს 150 დიდი ქალაქი, დასაქმებულობისა და სულ მოსახლეზე შემოსავლის მიხედვით გლობალურ ფინანსურ კრიზისამდე და 2009-2010 წლებში. კრიზისიდან გამოსვლის თვალსაზრისით, ლიდერობა ჩინურმა ქალაქებმა არავის დაუთმო. კრიზისიდან გამოსვლა ასევე, კარგად მოახერხეს აზიურმა ქალაქებმა – ტაიბეიმ, ბანგკოკმა, ჯაკარტამ და ლათინური ამერიკის ქალაქებმა – სანტიაგომ, ბოგოტამ და რიო-დეჟანეირომ. გამოკვლევაში პირველ ადგილზე სტამბული გავიდა. რაც შეეხება ევროპულ ქალაქებს, ყველაზე კარგი მდგომარეობა კრიზისთან ბრძოლის მიხედვით, პოლონურ ქალაქებში – კრაკოვსა და ვარშავაშია. ევროპის ქალაქების უმრავლესობა მხოლოდ ნაწილობრივ გამოვიდა კრიზისიდან, რაც ევროზონაში არსებული კრიზისის ფონზე არცთუ ძნელი ასახსნელია. ევროკავშირის ყველაზე პრობლემური ქვეყნების – საბერძნეთის, პორტუგალიის, ესპანეთისა და ირლანდიის ქალაქებში უმუშევრობა დღემდე იზრდება, შემოსავლები კი მცირდება. ირლანდიის დედაქალაქმა დუბლინმა კრიზისთან ბრძოლის რეიტინგში ბოლო ადგილი დაიკავა.