იტალიელი ვეტერანი ფორვარდი და „მილანის“ ვარსკვლავი ფილიპო ინძაგი ამჟამად მძიმე ტრავმისგან იკურნება და სავარაუდოდ, მისი გამოჩენა მწვანე მინდორზე 2011 წლის შემოდგომამდე არ მოხერხდება. სამაგიეროდ, სასიყვარულო ფრონტზე პიპოს, როგორც მას იტალიელი ტიფოზები უწოდებენ, საქმეები კარგად მისდის. მისი ამჟამინდელი მეგობარი გოგონა – მოდელი ალესია ვენტურა მისგან შვილის გაჩენასაც კი გეგმავს. სხვათა შორის, ვრცელდებოდა ინფორმაცია, რომ „კაზანოვად“ წოდებულ ინძაგის რომანი იტალიის ყველაზე სექსუალურ ტელეწამყვანთან – მარიკა ფრუსიოსთან ჰქონდა და ამის თაობაზე, თითქმის ყველა ჭორაობდა. თუმცა, ალესიას ამისთვის ყურადღება არ მიუქცევია და ამასწინანდელ ინტერვიუში კითხვაზე – რას იტყოდით ინძაგისგან შვილის ყოლაზეო, ამაყად უპასუხა – რატომაც არაო.