რაოდენ პარადოქსულადაც არ უნდა ჟღერდეს, შვედეთის ფეხბურთელთა ნაკრების ყოფილი ექიმი – მაგნუს ფორსბლადი გეგმავს შვედეთის ჩემპიონატის თასის გაჭრას, სრული ამ სიტყვის მნიშვნელობით. საქმე კი ისაა, შვედეთში ვარაუდობენ, რომ თასის შიგნით გაკეთებულია წარწერა, სადაც წერია – „ბაიენი სამუდამოდ“. „ბაიენი“ კი შვედური კლუბ „ჰამარბიუს“ თიკუნია. მსგავსი წარწერა კი თასზე დაუშვებელია. თასი გარდამავალია და მისი ამჟამინდელი მფლობელი კლუბი „მალმიოა“. ფორსბლადი აპირებს ლაპარასკოპიული ოპერაცია ჩაატაროს, ზუსტად ისეთი, როგორსაც ფეხბურთელებს დაშავებულ მუხლზე უკეთებენ. თასს გაუკეთდება პატარა ნახვრეტი და შემოწმდება მართალია თუ არა დიზაინერ პიტერ გუსტაფსონის ვარაუდი წარწერის თაობაზე. საინტერესოა, რომ თასი, რომელიც „უეფას“ ექს-პრეზიდენტის ლენარტ იოჰანსონის სახელს ატარებს, 2001 წლიდან თამაშდება და „ჰამარბიუ“ მას, მხოლოდ ერთხელ ფლობდა.