ამერიკული „ენბიეის“ კალათბურთელები რომ რეპით არიან დაინტერესებულნი, არცთუ ახალი ამბავია. წლებია შაკილ ონილი და სხვა ვარსკვლავები რეპის კომპოზიციებს ასრულებენ და ალბომებსაც უშვებენ. თუმცა, ის, რაც ტეხასური „დალას მავერიქსის“ წევრებმა გააკეთეს, მაინც მოულოდნელი იყო. გერმანელმა ვარსკვლავმა დირკ ნოვიცკიმ და მისი გუნდის წევრებმა ცნობილი რეპერის, კენი ვესტის ახალ კომპოზიციაზე – „ფაუერ“ საკუთარი კლიპი გადაიღეს. კლიპის ხანგრძლივობა სულ რაღაც წუთი და 20 წამია და რეპერის ნაცვლად ეკრანზე ნოვიცკი, შონ მერიონი და ჯეისონ კიდი ჩნდებიან. საინტერესოა, რომ კლიპი „მოძრავი სურათის“ ფორმატშია გადაღებული და კალათბურთელებთან ერთად მასში „მავერიქსის“ გამამხნევებელი მოცეკვავე გოგონებიც მონაწილეობენ. კლიპი დიდი პოპულარობით სარგებლობს ვიდეო-პორტალ „იუთუბიზე“.