სამკურნალო მცენარე ნეგოს ნაყენი, ძირითადად, ღვიძლისა და ნაღვლის ბუშტის დაავადების დროს გამოიყენება. მათი გავლენით ძლიერდება ნაღვლის გამოყოფა, იცვლება ნაღვლის შემადგენლობა, მცირდება სისხლში ბილირუბინისა და ქოლესტერინის რაოდენობა. ამასთან ერთად, იზრდება კუჭისა და კუჭქვეშა ჯირკვლის სეკრეცია.

ქოლეცისტიტისა და ჰეპატიტის დროს გამოიყენეთ შემდეგი ნახარში: ათ გრამ, ანუ სამი სუფრის კოვზ, ნეგოს დაქუცმაცებულ ყვავილს, რომელსაც აფთიაქში შეიძენთ, დაასხით ერთი ჩაის ჭიქა, ოთახის ტემპერატურის წყალი, მჭიდროდ დაახურეთ თავსახური და გააცხელეთ მდუღარე წყლის ორთქლზე, დაახლოებით ნახევარი საათის განმავლობაში. თან, ხშირად ურიეთ. შემდეგ გადმოდგით, გააცივეთ და გადაწურეთ. დაუმატეთ გადადუღებული წყალი საწყისი მოცულობის, ანუ 200 მილილიტრის მიღებამდე. შეინახეთ გრილ, ბნელ ადგილას, ორი დღე-ღამის განმავლობაში. მიიღეთ ერთი სუფრის კოვზი 3-ჯერ დღეში, ჭამის წინ, ათი-თხუთმეტი წუთით ადრე.