განთქმული ფილიპინელი მოკრივის, მენი პაკიაოს თქმით, მისი კარიერის უკანასკნელი ორთაბრძოლა 2013 წელს შედგება. თუმცა, იმ კოლოსალურ ჰონორარებს თუ გავითვალისწინებთ, რასაც იგი თითო დარტყმაში იღებს, ძნელი წარმოსადგენია, პაკიაო თავისი ფეხით წავიდეს პროფესიონალური რინგიდან. საქმე ისაა, რომ ფილიპინურმა გაზეთმა „ფილიპინ სთარსმა“ გამოთვალა და აღმოჩნდა, რომ პაკიაოს თითო დარტყმა, საშუალოდ, 52,7 ათასი დოლარი ღირს. მთლიანობაში კი, ერთ ბრძოლაში აღებული ჰონორარი 20-25 მილიონ ამერიკულ დოლარს შეადგენს. გაზეთის ცნობით, თითო რაუნდში პაკიაო – 2 მილიონს, რინგზე გატარებულ ერთ წუთში – 694 ათასს, ერთ წამში – 11,5 ათასს დოლარს იღებს.