2010 წლის ივლისიდან სექტემბრამდე იაპონიის ეკონომიკა იმაზე სწაფი ტემპით გაიზარდა, ვიდრე ამას ელოდნენ. ანალიტიკოსების თქმით, ეს ზრდა დროებითი მოვლენაა. 2010 წლის მესამე კვარტალში იაპონიის მთლიანი შიდა პროდუქტი 0.9 პროცენტით გაიზარდა, მეორე კვარტალში კი მხოლოდ 0,4 პროცენტით. ექსპერტების თქმით, ეკონომიკის მოულოდნელი ზრდა ეკოლოგიურად სუფთა ავტომანქანების გაყიდვის მატებასთან არის დაკავშირებული. ეს სამთავრობო პროგრამას უკავშირდება, რომლის განხორციელების პროცესშიც ხელისუფლებამ მოქალაქეებს „მწვანე მანქანების“ შესყიდვისთვის სერიოზული სუბსიდია გამოუყო. გარდა ამისა, სიგარეტზე ახალი გადასახადების დაწესების წინ, მწეველებმა დიდი მარაგი შეიქმნეს. ექსპერტების თქმით, ზრდა 2010 წლის მეოთხე კვარტალში შეჩერდება. იაპონური პროდუქციის ექსპორტი კვლავ ზარალდება იენის მაღალი კურსის გამო. ეს იაპონურ საქონელს უცხოელი მყიდველებისთვის ძალიან ძვირად ღირებულს ხდის და იაპონელი ექსპორტიორების შემოსავალს ამცირებს იმ შემთხვევაში, თუ ისინი პროდუქციას არ გააიაფებენ.