ლამაზი მკერდი – ქალის სიამაყე
მკერდი – ქალის სხეულის ყველაზე ნაზი, ამასთანავე, ყველაზე მგრძნობიარე და ყურადღებამისაქცევი ნაწილია. აქედან გამომდინარე, მის სილამაზეზე ზრუნვის პარალელურად, არ უნდა დაგვავიწყდეს, ვიზრუნოთ მის ჯანმრთელობაზეც. მხოლოდ ჯანმრთელ ქალს შეუძლია, იყოს ჭეშმარიტად ლამაზი.
მანამ, სანამ სპა-პროცედურების ჩასატარებლად წახვალთ, ან რაიმე კრემს გამოიყენებთ, აუცილებლად მიაკითხეთ კონსულტაციისთვის ექიმს, რათა დაადგინოთ, რომელი პროცედურაა თქვენი ჯანმრთელობისთვის უსაფრთხო.
რაც შეეხება ვიზუალურ და ფიზიკურ მდგომარეობას, იმისთვის, რომ მკერდი სოლიდურ ასაკშიც კი ახალგაზრდულად გამოიყურებოდეს, ყოველდღე უნდა შეასრულოთ სპეციალური ვარჯიშები.
გაითვალისწინეთ, რომ ზოგიერთი ვარჯიში ჰანტელებით უნდა შესრულდეს. ამიტომ, შეარჩიეთ ისეთი სიმძიმის ჰანტელი, რომ ზედმეტი დაძაბულობის გარეშე შეძლოთ ყოველი ვარჯიშის 10-15-ჯერ განმეორება.
ვარჯიში 1
დაწექით სწორ, მაგარ ზედაპირზე ზურგით. ჰანტელები ნელ-ნელა აღმართეთ ტანის პერპენდიკულარულად. რამდენიმე წამს ასე გაჭიმული გააჩერეთ მკერდის ზემოთ, მერე ისევ ნელ-ნელა დაუშვით მუხლებისკენ.
პირველ დღეს ვარჯიში შეასრულეთ 5-ჯერ, მერე ყოველდღიურად 5-5-ით უმატეთ.
ვარჯიში 2
დაწექით ზურგზე. დაიჭირეთ ჰანტელი თეძოს გასწვრივ, მკლავში გაშლილი ხელებით. ნელი მოძრაობით ასწიეთ თავს ზემოთ და ისევ ნელა დაუშვით.
ვარჯიში დაიწყეთ 5-ით და ადით 15-მდე.
ვარჯიში 3
დადექით სწორად. ჰანტელები დაიჭირეთ მკერდის გასწვრივ და ერთმანეთს მიატყუპეთ. ნელ-ნელა გაშალეთ ხელები მაქსიმალურად, მერე ისევ მკერდის გასწვრივ შეატყუპეთ.
ვარჯიში დაიწყეთ 5-ით და საბოლოოდ ადით 15-მდე.
ვარჯიში 4
დადექით სწორად. ხელები იდაყვებში მოხარეთ, ხელისგულები კი მკერდის წინ შეატყუპეთ (როგორც ლოცვის დროს) და შეეცადეთ, მაქსიმალური ძალით მიაჭიროთ ერთმანეთს ორივე ხელისგული. დაწოლის ძალა ისეთი უნდა იყოს, რომ მთელი სხეული დაიჭიმოს. მაქსიმალური მიჭერის პერიოდი 5-10 წამს უნდა გაგრძელდეს. მერე მოეშვით და რამდენიმე წამის შემდეგ ისევ გაიმეორეთ.
ეს ვარჯიში დაიწყეთ 10-ით და თანდათან ადით 25-მდე.
ვარჯიში 5
დადექით სწორად. ერთ ხელში დაიჭირეთ ჰანტელი, მეორე ხელი მოჰკიდეთ ჰანტელიანი ხელის იდაყვს და მიეხმარეთ სიგანეზე გაშლაში. მერე ნელ-ნელა დაუშვით ქვემოთ.
გაიმეორეთ 10-ჯერ.
ვარჯიში 6
დაწექით ხალიჩაზე სახით ქვემოთ, დაეყრდენით მუხლებსა და ხელის მტევნებს და გააკეთეთ აჭიმვები (10-12-ჯერ).
ვარჯიში 7
ორივე ხელში აიღეთ ჰანტელები, გაშალეთ ხელები მკერდის გასწვრივ და მონაცვლეობით „დაატრიალეთ“ ჰაერში საათის მიმართულებით ჯერ ერთი ხელი, მერე – მეორე, ბოლოს კი – ორივე ერთად რამდენიმეწამიანი პაუზებით. შემდეგ მიმართულება შეცვალეთ და იგივე გაიმეორეთ. თითოეული მოძრაობა შეასრულეთ 10-15-ჯერ.
ვარჯიშის დასრულების შემდეგ მიიღეთ ნელთბილი შხაპი და ნახევარი საათით წამოწექით.