მოდის სახლი „მატერია“, რომელიც რამდენიმე დიზაინერს აერთიანებს, გასულ კვირას ვიწრო წრეში, მაგრამ საზეიმო ვითარებაში გაიხსნა. უკვე დიდი ხანია, რაც დიზაინერები ქეთი კალანდაძე, თიკა შენგელია და თეონა თავართქილაძე ამ მაღაზიისთვის სამოსს კერავენ, რომელიც იქვე იყიდება. აღსანიშნავია, რომ ამ მოდის სახლში იყიდებოდა დათუნა სულიკაშვილის, ნინო ჩუბინიშვილისა და სხვა ძალიან ბევრი ცნობილი დიზაინერის სამოსი. ამჟამად მათ ლაშა მდინარაძეც დაემატა. ლაშა, იგივე გუდუ (სწორედ ამ მეტსახელითაა ცნობილი ის თბილისურ წრეებში), დიდი ხნის განმავლობაში მუშაობდა სხვადასხვა ცნობილი ადამიანის საეთერო იმიჯზე. „მატერია“ იმით არის უნიკალური, რომ აბსოლუტურად განსხვავებული გემოვნების ადამიანებს შეუძლიათ, არჩევანი გააკეთონ და ექსკლუზიური სამოსი შეუკვეთონ.