„უკვე ფორმაში ვარ!“ – ამ სანატრელი ფრაზის წარმოთქმას ნამდვილად შეძლებთ, თუკი დაიცავთ ჩვენ მიერ შემოთავაზებულ დიეტას, უფრო სწორად, ჯანმრთელი კვების სისტემას, რომელიც ცნობილ ამერიკულ მეიოს კლინიკაში შეიმუშავეს ამ დარგის წამყვანმა მეცნიერებმა.

გახდომის მსურველებს უნდა ახსოვდეთ ერთი მარტივი ჭეშმარიტება: არანაირი ფოკუსები და მკაცრი აკრძალვები არ მოგიტანთ ისეთ სასურველ შედეგს, როგორც სამი მთავარი წესი: არ დანაყრდეთ, მეტი იმოძრავეთ და დასაძინებლად მშიერი დაწექით.

მეიოს კლინიკის სპეციალისტებს ახალი ველოსიპედი ნამდვილად არ გამოუგონებიათ, უბრალოდ, მათ თეორია პრაქტიკაში გადაიტანეს. მათი თეორიის მთავარი პოსტულატი კი ასეთია (ზოგიერთი ცნობილი დიეტოლოგის მოსაზრებისგან განსხვავებით): არანაირი უკიდურესი ზომები და შიმშილი! კვება უნდა იყოს ბალანსირებული, და... არის კიდევ რამდენიმე ნიუანსი, რომლებსაც ქვემოთ შემოგთავაზებთ:

კალორიების სადღეღამისო ნორმა თავად უნდა დაადგინოთ მეიოს კლინიკის ექსპერტების ზოგადი მითითებების გათვალისწინებით: ქალი, რომელიც ეწევა ზომიერად აქტიურ ცხოვრებას, დღეში უნდა იღებდეს 1 800-2 000 კილოკალორიას. მაგრამ, თუ თქვენ ზედმეტი კილოგრამების მოშორება გსურთ, მოგიწევთ, კალორიების ეს რაოდენობა შეამციროთ. პრაქტიკამ გვიჩვენა, რომ კალორიების რაოდენობის 1 200-მდე შემცირება ხელს შეგიწყობთ, გახდეთ სწრაფად, ეფექტურად, უმტკივნეულოდ და, თანაც, არანაირი ვნება არ მიადგება ჯანმრთელობას.

შეიძლება, აწარმოოთ უფრო ზუსტი გათვლაც: შედით კლინიკის საიტზე, შეიყვანეთ თქვენი მონაცემები: სიმაღლე, წონა, ასაკი, სქესი, მიზანი (ანუ გახდომა გსურთ თუ წონის შენარჩუნება) და გაიგებთ, დღეში რამდენი კილოკალორიის მიღებას გირჩევენ მეიოს დიეტოლოგები. ამის მიხედვით კი გეცოდინებათ, რომელი პროდუქტები და რა რაოდენობით უნდა მიირთვათ დღის განმავლობაში. საკვების ენერგეტიკული ღირებულების გამოთვლას ლომის წილი მიუძღვის წარმატებით გახდომაში. მაგრამ ეს მაინც არ არის საკმარისი. კვებისას მთავარია, მიიღოთ რაც შეიძლება მეტი უჯრედისი – ბოჭკოვანი ნივთიერება, რომელთა ათვისებასაც, ცხიმების, ცილებისა და ნახშირწყლებისგან განსხვავებით, ორგანიზმი არ ახდენს. უჯრედისი გაივლის მთელ საჭმლის მომნელებელ სისტემას ისე, რომ ორგანოების მიერ არ შეიწოვება. ალბათ, იკითხავთ, მაშ, რისთვის არის ის საჭირო? ახლავე მოგახსენებთ. დადგინდა, რომ უჯრედისი არსებობს ორი სახის: ხსნადი და არახსნადი. ხსნადი იხსნება წყალში (რომელსაც ორგანიზმი მიიღებს) და გადაიქცევა გელის მსგავს მასად, რომელიც წმენდს სისხლძარღვებს ქოლესტერინისგან; არახსნადი უჯრედისი კი (რომელსაც დიდი რაოდენობით შეიცავს ციტრუსები, ვაშლი, პარკოსნები და ბურღულეულისა და მარცვლოვანი მცენარეების ქერქი) სხვანაირად აწესრიგებს ორგანიზმს – წმენდს მას წიდებისგან და ხელს უწყობს კუჭ-ნაწლავის ნორმალურ მოქმედებას. გარდა ზემოთ ჩამოთვლილი პროდუქტებისა, მას შეიცავს თხილი, კაკალი, ბოსტნეული და ყველა მარცვლოვანი კულტურა.

უჯრედისით მდიდარი პროდუქტები, როგორც წესი, კარგად უნდა დაღეჭოთ, რაც, ასევე, დაგაზღვევთ ზედმეტად დანაყრებისგან, რადგან, რაც უფრო დიდხანს ღეჭავთ საკვებს, მით მალე მოდის დანაყრების შეგრძნება.

უჯრედისის დღიური ნორმაა: 50 წლამდე ქალბატონებისთვის – 25 გრამი, 50 წლის ზემოთ – 21 გრამი. უჯრედისის მატება საკვებში ნელ-ნელა უნდა მოხდეს, რამდენიმე კვირის განმავლობაში, რომ მომნელებელ სისტემაში არსებული ბაქტერიები შეეჩვიონ ახალ დატვირთვას. სვით შეძლებისდაგვარად ბევრი წყალი, რადგან მასთან შერევისას უჯრედისის დადებითი ქმედებები აქტიურდება.

გთავაზობთ უჯრედისით მდიდარი პროდუქტების ჩამონათვალს:

ხილი

ჟოლო – 200 გრამში – 8 გრამი უჯრედისი;

მსხალი კანიანად – 1 ცალში – 5,5 გრამი;

ვაშლი კანიანად – 1 ცალში – 4,5 გრამი;

მარწყვი – 250 გრამში – 4 გრამი;

ბანანი – 1 ცალში (საშუალო ზომის) – 3 გრამი;

ფორთოხალი – 1 ცალში – 3 გრამი.

ბურღულეული და მაკარონი

მაკარონი – 200 გრამში, მზა კერძის სახით – 6 გრამი უჯრედისი; წიწიბურა – 200 გრამში, მზა სახით – 6 გრამი; „ჰერკულესი“ – 200 გრამში, მზა სახით – 4 გრამი; ყავისფერი ბრინჯი – 200 გრამში, მზა სახით – 3,5 გრამი; ცეხვილი შავი პური – 1 ნაჭერში – 2 გრამი.

პარკოსნები და თხილეული

მუხუდო (ბარდა) – 200 გრამი, მზა სახით – 16 გრამი; ლობიო – 200 გრამში, მზა სახით – 11 გრამი; მზესუმზირა – 200 გრამში – 12 გრამი; ნუში – 100 გრამში – 12 გრამი.

ბოსტნეული

ბროკოლი – 200 გრამში, მზა სახით – 5 გრამი; სიმინდი დაკონსერვებული – 200 გრამში – 4 გრამი; საშუალო ზომის, კანიანად მოხარშული კარტოფილი – 1 ცალში – 3 გრამი; ტომატ-პასტა – 50 გრამში – 3 გრამი; უმი სტაფილო – 1 ცალი საშუალო ზომის – 2 გრამი.