კითხვა: მყავს ავტომობილი „ფოლკსვაგენ გოლფი 3”, რომელსაც, ეგრეთ წოდებული, თხუთმეტიანი დისკები უყენია. ძალიან ლამაზი ჩვიდმეტიანი დისკები ვნახე და თუ შეიძლება, ჩემს ავტომობილზე მისი დაყენება?

პასუხი: დისკების შეცვლის დროს ბევრი ფაქტორია გასათვალისწინებელი. რა თქმა უნდა, შეიძლება, რომ „გოლფზე” ჩვიდმეტიანი დისკებიც დააყენოთ, მაგრამ უნდა ვიცოდეთ რა სიგანისაა დისკი და, ასე დავარქვათ, როგორი გამოწეულობა აქვს. ყველა დისკს თავისი მონაცემები აწერია. თუ ის არის ექვს-ნახევარი ჯეი, არა უშავს, შვიდიც კიდევ ნორმალურია „გოლფ 3-ზე“, მაგრამ შვიდ-ნახევარი და რვა ჯეი, უკვე პრობლემაა. შეიძლება, შვიდ-ნახევარი ზომა დისკიც კი დადგეს, მაგრამ აქ უკვე მეორე პარამეტრს გააჩნია, ანუ გამოწეულობას. ის დისკზე შემდეგნაირად აღინიშნება – „ეტა” ანუ ლათინური ასოებით „ET”. უნდა დავაკვირდეთ ამ პარამეტრს. რაც უფრო დაბალია „ეტას” ციფრი, ვთქვათ – ოცი, თხუთმეტი, ათი – მით მეტია დისკის გარე გამოწეულობა. თქვენს შემთხვევაში სასურველია, ნაკლები გარე გამოწეულობა ჰქონდეს. ვინაიდან კარგად გამოშვერილი დისკები უფრო უკანა წამყვანი ავტომობილებისთვისაა განკუთვნილი და არა წინა წამყვანისთვის. თუ გნებავთ ჩვიდმეტიანი დისკი დააყენოთ, მაშინ უნდა დააკვირდეთ ამ მონაცემებს და მის მიხედვით შეარჩიოთ. თუ ძალიან განიერია ან ძალიან არის გამოწეული, მისი დაყენება პრობლემებს შეგიქმნით. აქვე გეტყვით, რომ ეს პრობლემა 2000 წლამდე გამოშვებულ ავტომობილებს უფრო აქვთ. თანამედროვე ავტომობილებში ფრთა ისე ღრმადაა ამოჭრილი, რომ იქ დიდი საბურავების დაყენებაც მოსახერხებელია.

კითხვა: მაინტერესებს, როდის უნდა ჩაისხას ავტომობილში ანტიფრიზი?

პასუხი: ამასთან დაკავშირებით ხშირად გვისაუბრია. ავტომობილში, სასურველია, ანტიფრიზი ზამთარ-ზაფხულ ესხას. ის ისევე იცავს წყალს ადუღებისგან, როგორც გაყინვისგან, რაც ერთნაირად პრობლემაა ავტომობილისთვის. თუ მთელი ზაფხული არ გესხათ, მაშინ გვიან შემოდგომაზე შეგიძლიათ, ანტიფრიზის ჩასხმა, როცა ავტომობილს, საბურავებს და სხვა, ზამთრისთვის მოამზადებთ.