სალვატორე სკილაჩი ხომ გახსოვთ, მსოფლიოს 1990 წლის ჩემპიონატზე იტალიის ნაკრებში შემთხვევით რომ მოხვდა და მერე ყველა თამაშში გოლი რომ გაიტანა? ჰოდა, კარიერის დასრულების შემდეგ ტოტომ ხან კომენტატორობა სცადა, ხან – მწვრთნელობა, მაგრამ საკუთარი ადგილის მოძებნა ყველგან გაუჭირდა და ახლა მსახიობობა გადაწყვიტა – მას ფილმში იღებენ, სადაც მაფიის ბოსის როლს შეასრულებს და ამ ამბით სკილაჩი ძალიან გახარებულია.

„ყოველთვის მინდოდა მარლონ ბრანდოს ადგილზე ვყოფილიყავი და მაფიის ბოსის როლი მეთამაშა. ახლა ამის შესაძლებლობა მაქვს და არც კი ვიცი, სიხარული როგორ გამოვხატო. მაქსიმუმს გავაკეთებ იმისთვის, რომ როლს კარგად მოვერგო“, – განაცხადა სკილაჩიმ და, იმის გათვალისწინებით, რომ იგი სიცილიელია, როლის მორგება დიდად არ უნდა გაუჭირდეს.