ჩვენ ერთხელ უკვე შემოგთავაზეთ ბალანსირებული დიეტის ერთი ვარიანტი, ახლა გთავაზობთ მეორე ვარიანტს, რომლის დღიური ნორმა შეადგენს 1 200 კილოკალორიას.

დიეტა მოიცავს 3 ძირითად კვებას (საუზმე, სადილი, ვახშამი) + 3 ძალიან მსუბუქ შუალედურ წახემსებებს კვებასა და კვებას შორის (თითო წახემსება – 100 კილოკალორია) + სასმელი (გაზგასული მინერალური სასმელი და უშაქრო მწვანე ჩაი).

საუზმე (9-10 საათზე):

1 ჩაის კოვზი ზეთი, 2 ჩაის კოვზი ყავისფერი შაქარი, 3 ჩაის კოვზი გახეხილი ვაშლი, 1 კვერცხის ცილა, ნახევარი ჩაის ჭიქა „ჰერკულესი“, დანის წვერით – დარიჩინი, 1/4 ჩაის ჭიქა უცხიმო რძე. ეს ყველაფერი აურიეთ ერთმანეთში. ტაფას მოუსვით ზეთი და მიღებული მასა შიგ მოათავსეთ. შედგით ცხელ ჰაერღუმელში 30 წუთის განმავლობაში (ღუმლის კარი ღია დატოვეთ). რომ გამოცხვება, გაჭერით შუაზე. ნახევარი მიირთვით, ნახევარი კი მეორე დილისთვის შეინახეთ მაცივარში.

1 ულუფა შეიცავს 204 კილოკალორიას, 8 გრამ ცილებს, 34 გრამ ნახშირწყლებს, 4 მილიგრამ უჯრედისს, 4 გრამ ცხიმებს, 0,5 მილიგრამ ქოლესტერინს.

ნოყიერი სადილი (14-15 საათზე):

მოხარშეთ 100 გრამი თეთრი ლობიო, შეურიეთ 1 ჩაის ჭიქა ტომატის წვენი, თითო ცალი წვრილად დაჭრილი კიტრი და პომიდორი, 2-2 ძირი მწვანე ხახვი, ოხრახუში და 1 კბილი ნიორი (ყველაფერი ძალიან წვრილად დაჭრილი), 1/4 ჩაის კოვზი ჩილის სოუსი, 2 ნაჭერი ლაიმის წვენი. ეს ყველაფერი კარგად აურიეთ და შედგით მაცივარში 1 საათით. სუპი მიირთვით ცივი.

1 ულუფა შეიცავს 191 კილოკალორიას, 7 გრამ ცილებს, 38 გრამ ნახშირწყლებს, 9 მილიგრამ უჯრედისს, 3 გრამ ცხიმებს, 0 მილიგრამ ქოლესტერინს.

ვახშამი:

ინგრედიენტები: 100 გრამი ქათმის ფილე, ნახევარი ჩაის ჭიქა წყალი, 1 სადილის კოვზი ყავისფერი ბრინჯი, 1 კბილი დაჭრილი ნიორი, 1 ჩაის კოვზი ზეთი, 1 პატარა სტაფილო, ნახევარი ბულგარული წიწაკა, 100 გრამი წვრილად დაჭრილი დაკონსერვებული ანანასი, 2 სადილის კოვზი დაკონსერვებული მწვანე ბარდა.

მარინადისთვის: ნახევარ-ნახევარი ჩაის კოვზი ვაშლის ძმარი და სოიის სოუსი, 1/4 ჩაის კოვზი გახეხილი იმბირი.

სოუსისთვის: 1 ჩაის კოვზი კარტოფილის სახამებელი, 1/4 ჩაის კოვზი გახეხილი იმბირი და ამდენივე ვაშლის ძმარი, 2 ჩაის კოვზი ანანასის წვენი, ნახევარი ჩაის კოვზი სოიის სოუსი.

ჩააწყვეთ დაჭრილი ქათმის ფილე მარინადში და დაამატეთ სოუსისთვის განკუთვნილი ინგრედიენტები.

ნახევარ ჩაის კოვზ ზეთში მოშუშეთ სტაფილო და წიწაკა, დაამატეთ ანანასი და ბარდა, კიდევ მოშუშეთ და მიღებული მასა გადაიღეთ ჯამში. ტაფაში ჩარჩენილ ცხიმში შებრაწეთ ფილეს ნაჭრები, დაამატეთ ბოსტნეული და შუშეთ 1-2 წუთის განმავლობაში. ჩაამატეთ სოუსი და მიიყვანეთ ადუღებამდე. გარნირად შეგიძლიათ, მოხარშოთ 1 სადილის კოვზი ბრინჯი.

1 ულუფა შეიცავს 260 კილოკალორიას, 17 გრამ ცილებს, 35 გრამ ნახშირწყლებს, 4 გრამ უჯრედისს, 5 გრამ ცხიმებს, 33 მილიგრამ ქოლესტერინს.

შუალედებში წასახემსებლად მიირთვით 1 ჩაის ჭიქა მაწონი, 200 გრამი ხილი, 100 გრამი ხაჭო, 1 ცალი მოხარშული კვერცხი, უპუროდ, დღის განმავლობაში 2-3 ჭიქა მწვანე ჩაი და 1,5 ლიტრი მინერალური წყალი.