მსოფლიოს ავიაკომპანიები წელს გაცილებით მეტ მოგებას ნახავენ, ვიდრე ამას ადრე ელოდნენ. ამის მიზეზი მთელ მსოფლიოში ბიზნესის აღდგენა და ეკონომიკური ვარდნის შეჩერებაა. ოფიციალური მონაცემები საჰაერო ტრანსპორტის საერთაშორისო ასოციაციამ გამოაქვეყნა. ასოციაციის მონაცემებით, მსოფლიოს ავიაკომპანიების შემოსავლები 8,9 მილიარდ დოლარს შეადგენს. საინტერესოა, რომ ჯერ კიდევ ორი თვის წინათ, საჰაერო ტრანსპორტის ასოციაციამ იწინასწარმეტყველა, რომ ავიაკომპანიების შემოსავალი ამ პერიოდში მხოლოდ 2,5 მილიარდი იყო. 2010 წლის მარტში 2,8-მილიარდიან ზარალს ვარაუდობდნენ. 2009 წლის მონაცემებით, ავიასფეროს ზარალმა 9 მილიარდი დოლარი შეადგინა. ექსპერტები აცხადებენ, რომ ავიაგადაზიდვებზე მოთხოვნა გაიზარდა. ასოციაციის პროგნოზებით, ჩრდილოეთ ამერიკის ავიაგადამზიდების შემოსავლები 1,9 მილიარდი დოლარი უნდა ყოფილიყო, სინამდვილეში კი ეს მაჩვენებელი 2,2 მილიარდს აღწევს. მიუხედავად ამჟამინდელი წინსვლისა, მომავალ წელს ავიაკომპანიების შემოსავალი ნახევრად შემცირდება – განაცხადა საერთაშორისო საჰაერო-სატრანსპორტო ასოციაციის წარმომადგენელმა.