კინოსტუდია „სანგუკო“ და „კონტროლსტუდიო“ ხუთი ფილმის გადაღებას რომ გეგმავდა, ამის შესახებ ჩვენ სისტემატურად გაწვდით ინფორმაციას. ფილმების გადაღება ივნისიდან დაიწყო და ერთი წლის განმავლობაში ეტაპობრივად დასრულდება. „პროექტ 5-ის“ ბიუჯეტი ორი მილიონ ოთხასი ათასი ლარია. 24 სექტემბერს კი, პროექტის ხელმძღვანელებმა ირაკლი ჩხიკვაძის ახალი ფილმის „გული+-ის“ გადაღების დაწყებასთან დაკავშირებით, პრესკონფერენცია გამართეს. ფილმის გადაღება 27 სექტემბრიდან დაიწყება და 25 ოქტომბერს დასრულდება. ფილმის სიუჟეტი საკმაოდ სახალისო და რომანტიკულია. მე როგორც უბრალო მაყურებელს, რომელსაც მინდა, კინოში მივიდე და ძალიან ღრმა, ქართულ პრობლემებზე არ ვიფიქრო ერთი კვირა მაინც, ასეთი ფილმები ძალიან მომენატრა. „გული+“ არის ორგანიზაცია, რომელიც უიღბლოდ შეყვარებულებს სატრფოს გულის დაპყრობაში ეხმარებიან. როგორ გადაწყვეტს საბედისწერო შეყვარებული სამკუთხედის ბედს ორგანიზაცია, ამას ზამთარში დაგეგმლ პრემიერაზე შევიტყობთ. ფილმში მთავარ როლებს რუსკა მაყაშვილი, გიორგი ყიფიანი, ზაზა პაპუაშვილი, თამარ სხირტლაძე და ია სუხიტაშვილი თამაშობენ.