გასულ კვირას თურქეთში კალათბურთელთა მსოფლიოს ჩემპიონატი დასრულდა. მის დაწყებამდე კი ჩინელმა მოდელმა და მომღერალმა, ლიუ ფეიმ განაცხადა, თუ ჩვენი ქვეყნის ნაკრები ჯგუფიდან გავა, მზად ვარ გავშიშვლდეო. არადა, ჩინელებს ჯგუფიდან გასვლის შანსი, პრაქტიკულად, არ ჰქონდათ, მაგრამ მათ ბოლომდე იბრძოლეს და პატარა სასწაული მოახდინეს. ლიუს პირობა აქამდე არავის გახსენებია, მაგრამ სამშობლოში დაბრუნებულმა კალათბურთელებმა კატეგორიულად მოითხოვეს, ლიუმ თავისი პირობა შეასრულოსო. არადა, როგორი საქმეა, ფეის აქამდე არასდროს ჰქონია მიღებული მონაწილეობა თამამ ფოტოსესიებში და როგორც ჩანს, ამის გაკეთებას არც აპირებდა, მაგრამ აღდგა სრულიად ერი (მე თქვენ გეტყვით და ცოტა არიან) და ლიუს პირობის შესრულება მოსთხოვა.

„სხვა გზა არ მაქვს. მე პირობას ვასრულებ და იმედი მაქვს, რომ სწორედ ჩემმა განცხადებამ მოახდენინა ნაკრების წევრებს სასწაული“, –  განაცხადა ლიუმ და კალათბურთის ბურთთან ერთად აშკარად საინტერესო ფოტოები გადაიღო.