16 სექტემბერს კალათბურთელ ნიკა ცქიტიშვილს ქალიშვილი შეეძინა. ნიკას მეუღლემ ჩაჩავას სახელობის კლინიკის სამშობიარო სახლში გააჩინა გოგონა, ექიმ ზურა დარახველიძის დახმარებით. პატარა ოთხი კილო და სამასი გრამი და ორმოცდათერთმეტი სანტიმეტრი დაიბადა. დიდი წონის გამო ოჯახის წევრებმა ცოტა ინერვიულეს, მაგრამ ყველაფერმა მშვიდად ჩაიარა, დედამ ფიზიოლოგიურად იმშობიარა და გააჩინა პუტკუნა და ნაკეცებიანი პატარა. ამ დროს მეუღლის გვერდით არ იყო ნიკა. ის თამაშზე იმყოფებოდა ესპანეთში და ვერ დაესწრო ცოლის მშობიარობას, რაც ნიკამაც და ნათიამაც ძალიან განიცადეს. ახალშობილის ფოტოები მას სამშობიაროდანვე გადაუგზავნა დამ, ნინომ. როგორც ნინომ თქვა, გაოგნებული მელაპარაკებოდა, ისეთი ბედნიერი იყოო. 18 სექტემბერს კი, ნიკა თბილისში დაბრუნდა და შეძლო ცოლ-შვილის მოსიყვარულება. როგორც ნინომ გვითხრა, გოგონას ლიზას არქმევენ. ჩვენ ვულოცავთ წყვილს უდიდეს ბედნიერებას, პატარა ლიზას კი, მშობლებთან ერთად ჯანმრთელობასა და სიხარულს ვუსურვებთ.