სულ ცოტა ხნის წინ უკრაინის დედაქალაქში ქართული დელეგაცია ჩავიდა კლუბ „რეკორდის“ ხელმძღვანელთან, შოთა ქელდიშვილთან ერთად. საქმე ისაა, რომ აგვისტოში, კიევში, თავად კლუბის ხელმძღვანელმა, უკვე ოცდამეხუთედ დაამყარა მსოფლიო რეკორდი. ღონისძიება ადგილობრივი სპორტული კლუბის – „ამტას“ მიერ იყო ორგანიზებული, სპონსორი კი ავიაკომპანია „ავიასვიტი“ გახლდათ. ბატონი შოთა ერთი საათის განმავლობაში შეუჩერებლივ ასრულებდა რეზინის რგოლებზე – ესპანდერებზე თითებით მოჭერა-გაშლას და 2 772 მოძრაობა შეასრულა, ხოლო სამ წუთში ერთხელ – ერთ, ორ, სამ, ოთხ და ხუთ თითზე 768 მიზიდვა. რეკორდის დამყარების შემდეგ დაიგეგმა მომდევნო ვიზიტი – ქალაქ ლუკში ასპარეზით გამოსვლა, რაც იქ მცხოვრები ქართველებისა და ადგილობრივი უკრაინელების თხოვნით მოხდა.