ამ ზაფხულს ბერლინში ახალგაზრდა მუსიკოსების მეათე საიუბილეო ფესტივალი „იანგ ეურო კლასიკი” გაიმართა. ფესტივალის ერთ-ერთ საკონკურსო ნომინაციაში – „საუკეთესო მსოფლიო პრემიერა“ – მონაწილეობდა ახალგაზრდა ქართველი კომპოზიტორი, არჩილ გიორგობიანი, რომლის ნაწარმოები – „აზარი” – საუკეთესოდ დაასახელეს. აღსანიშნავია, რომ მსოფლიო პრემიერის საუკეთესო ნაწარმოებისთვის თექვსმეტი ქვეყნის წარმომადგენელი იბრძოდა და ერთადერთი პრემია ქართველს ხვდა წილად. „აზარი” არჩილ გიორგობიანის სადიპლომო ნამუშევარია, მან თბილისის კონსერვატორია, საკომპოზიციო სპეციალობით, ზურაბ ნადარეიშვილის ხელმძღვანელობით დაამთავრა. „აზარი“ აფხაზურ სამგლოვიარო ცერემონიალს ჰქვია, ისევე, როგორც „ზარი” – სვანეთში.

დაჯილდოების ცერემონიალმა არჩილის გარეშე ჩაიარა. ახალგაზრდა კომპოზიტორმა ბერლინში ჩასვლა ვერ მოახერხა, თუმცა, ფულად პრემიას, რომელიც გამარჯვებულისთვის იყო დაწესებული, ის აუცილებლად მიიღებს.