რაიან საგდენი ბრიტანელი მოდელია და უფრო ზუსტად თუ ვიტყვით, ფოტომოდელია. მის სურათებს ნახავთ ყველგან და ყველაფერზე, ანუ გოგონა არც პოპულარობის ნაკლებობას უჩივის და არც თაყვანისმცემლების, მაგრამ ფოტოების არ იყოს, გამორჩეული თაყვანისმცემლებშიც ჰყავს. იგი მადრიდის „რეალის” ვარსკვლავი კრიშტიანუ რონალდუა. ამის შესახებ რაიანმა პრესასთან ისაუბრა.

„რონალდუ ღამის ბარში გავიცანი. უფრო ზუსტად კი ის მომიახლოვდა და მითხრა, მე კრიშტიანუ რონალდუ ვარ და თუ შეიძლება შენი ტელეფონის ნომერი მომეციო. მივეცი და მას შემდეგ, დღეში ათჯერ მირეკავდა, შეტყობინებებს მიგზავნიდა. რამდენჯერმე შევხვდით კიდეც და ის ძალიან მხიარული ბიჭია. შეტყობინებებს დღემდე ვიღებ და პერიოდულად ვხვდებით კიდეც ერთმანეთს. ჩვენ კარგი მეგობრები ვართ,“ – განაცხადა რაიანმა.

სხვისი რა გითხრათ და რონალდუს მეგობრად, მაგალითად, ფეხბურთელი რაიან გიგზიც ითვლება და საეჭვოა, მას იმ რაიანთანაც იგივე ურთიერთობა ჰქონდეს, რაც ამ რაიანთან აქვს. არადა, თითქმის ორივე მეგობარია და ორივე რაიანი.