მილიარდერი რომ გახდე, სულაც არ არის აუცილებელი, კომპიუტერული პროგრამები გამოიგონო, ანდა, ფინანსური გენიოსი იყო. ამერიკაში წამყვანი კომპანიების ტოპ-მენეჯერებმა პრემიების, ბონუსებისა და სხვა შემოსავლების წყალობით, უდიდესი თანხები დააგროვეს. გავლენიანმა გაზეთმა „უოლ სტრიტ ჯორნალმა“ ბოლო ათი წლის განმავლობაში ამერიკის ყველაზე მაღალანაზღაურებადი 25 ტოპ-მენეჯერის სია გამოაქვეყნა. როგორც აღმოჩნდა, ყველაზე დიდ ბონუსებს მაღალტექნოლოგიური და პროგრამული უზრუნველყოფის მწარმოებელი კომპანიების ხელმძღვანელები იღებენ. მათ ამ სიაში 7 წარმომადგენელი აღმოჩნდა. უოლ-სტრიტის კომპანიების ტოპ-მენეჯერებს 5 ადგილი ერგოთ. ამერიკის 25 ყველაზე მაღალანაზღაურებად ხელმძღვანელთა შორის წარმომადგენლები საყოფაცხოვრებო საქონლის, ელექტროენერგეტიკის, ფარმაცევტიკის, ნავთობწარმოების, უძრავი ქონების, ტურიზმისა და სამთო-მომპოვებელ სფეროში მომუშავე კომპანიების ტოპ-მენეჯერებსაც ჰყავთ. ამერიკაში ყველაზე მაღალანაზღაურებადი ტოპ-მენეჯერი ლარი ელისონია, რომელიც, ამავე დროს, პროგრამული უზრუნველყოფის კომპანია „ორაკლის“ დამფუძნებელიცაა. მან ბოლო 10 წლის განმავლობაში 1,84 მილიარდი დოლარი გამოიმუშავა. მეორეა ტურისტული ინტერნეტ-პორტალ IAC-ის ტოპ-მენეჯერი ბერი დილერი, რომელმაც ათ წელიწადში 1,14 მილიარდი დოლარი მიიღო. მესამე ადგილი Occidental Petroleum Corp-ის გენერალურ დირექტორ რეი ირანს ხვდა წილად, რომელმაც 857 მილიონი გამოიმუშავა.