ამანდა ბირდი 14 წლის იყო, როცა სპეციალური საშვით 1996 წლის ატლანტის ოლიმპიადაზე დაუშვეს და იგი ჩემპიონი გახდა. მას შემდეგაც, ამანდამ არაერთხელ გააოცა სამყარო და ოლიმპიადა კიდევ მოიგო, მსოფლიოს ჩემპიონი და რეკორდსმენიც გახდა და ორი წლის წინ... დიდი სპორტიდან წავიდა. მაშინ იგი შვილის გაჩენას აპირებდა და ეს წარმატებით მოახერხა კიდეც. თუმცა, როგორც ჩანს, აუზი და წყალი მოენატრა და ისევ „დიდ ავიაციაში“ დაბრუნებას აპირებს.

„ვარჯიში უკვე დავიწყე და, დარწმუნებული ვარ, ფორმაშიც მალე ჩავდგები. მე ვიცი, რა შემიძლია და ამას მალე ყველას დავუმტკიცებ“, – ამბობს ამანდა. მას უკვე უფლება მისცეს, ამერიკის ღია პირველობაზე მოსინჯოს ძალები და, თუ გაიმარჯვებს, ოლიმპიურ ნაკრებში მოხვედრის სერიოზული შანსი გაუჩნდება.