მასაჟის დაწყების წინ დაჯექით მოხერხებულად, წელში გაიმართეთ და მხრები ჩამოუშვით, თავი კი ოდნავ უკან გადაწიეთ. ხელისგულებზე წაისვით ზეითუნის ზეთი, მიიჭირეთ ხელები ყელზე (ყბების ქვემოთ) და მსუბუქი მოძრაობით დაიწყეთ გასმა ზემოდან ქვემოთ და პირიქით (ყბის ძირიდან ლავიწის ძვლამდე).

ასეთივე წესით დაიმასაჟეთ კისერი თმის ძირებიდან ხერხემლის სათავემდე.

დახარეთ თავი, მარჯვენა ხელის საჩვენებელი და შუა თითებით წრიული მსუბუქი მოძრაობით დაიმასაჟეთ კისერი მე-7 მალასთან (9 მოძრაობა საათის ისრის მიმართულებით და 9 – საპირისპიროდ). შემდეგ თითები „ჩააჩოჩეთ“ ერთი მალით ქვემოთ და იგივე გაიმეორეთ.

ასევე, არ დაგავიწყდეთ, რომ ყელისა და კისრის ვიზუალურ მხარეზე ძალიან მოქმედებს პოზა, რომელშიც გძინავთ ხოლმე. იმიტომ, რომ არ გაგიჩნდეთ უსიამოვნო პერპენდიკულარული ნაოჭები, ეცადეთ, შეეჩვიოთ დაბალ სასთუმალს, ან, სულაც, უბალიშოდ ძილს. ასეთ შემთხვევაში კისრის ქვეშ ამოიდეთ რულეტივით დახვეული რბილი პირსახოცი. გარდა ამისა, შეეცადეთ, არავითარ შემთხვევაში არ დააბჯინოთ ნიკაპი მკერდს.

რაც შეეხება დეკოლტეს, მასაჟთან ერთად აუცილებელია მხრებისა და მკერდის ვარჯიშების ჩატარება. თანაც, სულაც არ არის სავალდებულო, ამისთვის ფიტნეს-დარბაზს ეწვიოთ. ამ უბრალო ვარჯიშებს სახლშიც მშვენივრად გააკეთებთ.

დაჯექით სწორსაზურგიან სკამზე, მჭიდროდ მიეყუდეთ და იდაყვები იატაკის პარალელურად, 180 გრადუსზე გაშალეთ. ხელები იდაყვებში მოხარეთ და მკერდის წინ ხელისგულები ერთმანეთს მიაბჯინეთ, 8-10 წამის განმავლობაში ხელი ხელს მიაჭირეთ, შემდეგ კი მოადუნეთ (ეს ვარჯიში გაიმეორეთ 3-4-ჯერ). შემდეგ, ისე, რომ ხელისგულები არ გააცალკევოთ, მკერდიდან წინ გაწიეთ 5-7 სანტიმეტრით და იგივე ვარჯიში გაიმეორეთ. ამის მერე თანდათან 5-5 სანტიმეტრით დააშორეთ ხელები მკერდს და ვარჯიში იმეორეთ მანამ, სანამ ხელისგულების მიბჯენა შეუძლებელი გახდება.

დადექით სახით კედელთან, 40-50 სანტიმეტრის დაშორებით. ხელები გაშალეთ წინ, მხრების გასწვრივ, მიეყრდენით კედელს ხელისგულებით და შეეცადეთ, ნელი და მძიმე მოძრაობით სხეული კედლიდან უკუაგდოთ. ეს იგივე აჭიმვაა, ოღონდ, იატაკის ნაცვლად კედელს იყენებთ. ვარჯიში გაიმეორეთ 20-25-ჯერ.

დადექით სწორად. ხელის მტევნები შეაერთეთ თავს ზემოთ, გააჩერეთ რამდენიმე წუთით და ისე, რომ არ მოხაროთ, დაუშვით წინ, მკერდის გასწვრივ, ისევ გააჩერეთ რამდენიმე წამით და დაუშვით ქვემოთ. ვარჯიში გაიმეორეთ 15-ჯერ.

დადექით სწორად. ფეხები დადგით მხრების სიგანეზე, ხელები ჩამოუშვით ტანის გასწვრივ. მარჯვენა ხელი გაშალეთ მკერდის წინ, მარცხენა კი – ზურგს უკან და ორივე ხელით ერთდროულად შემოხაზეთ ჰაერში 3 წრე. ყურადღება მიაქციეთ, რომ ამ დროს არ მოძრაობდეს ხერხემალი, მკერდის კუნთები კი დაჭიმული იყოს. რამდენიმეწამიანი შესვენების შემდეგ ხელების მიმართულება შეცვალეთ და იგივე ვარჯიში გაიმეორეთ.