ზაფხულში გახდომა გაცილებით ადვილია, მით უფრო, თუ ამ პროცესს სიამოვნებაც ახლავს თან.

გთავაზობთ კარტოფილზე დაფუძნებულ დიეტას, რომელიც, მართალია, ერთბაშად ვერ გაგხდით ბალერინას, მაგრამ, ხომ გახსოვთ, დიეტების უდავო ჭეშმარიტება: რაც უფრო ნელა იკლებთ, მით მეტად ხართ დაზღვეული წონის აღდგენისგან:

პირველი საუზმე (9 საათი): 1 ფინჯანი უშაქრო ყავა, 1 ნაჭერი შავი პურის ორცხობილა, 1 ნაჭერი უცხიმო და ნაკლებმარილიანი ყველი.

მეორე საუზმე (12 საათი): 1 ჭიქა უცხიმო მაწონი, 1 ცალი მოხარშული კვერცხი, 1 ჩაის ჭიქა უშაქრო ხილის წვენი.

სადილი (15 საათი): მოხარშეთ 200 გრამი კარტოფილი კანიანად, მერე გაფცქვენით და წვრილად დაჭერით. 100 გრამი უცხიმო ხაჭო ასრისეთ მინერალურ წყალში ისე, რომ კრემის კონსისტენცია მიიღოთ, შეურიეთ წვრილად დაჭრილი მწვანილი, 1 ცალი მომცრო ზომის, ასევე წვრილად დაჭრილი კიტრი, 1 ჩაის კოვზი სელის ზეთი, მარილი – გემოვნებით. ეს მასა მოასხით დაჭრილ კარტოფილს და მიირთვით. დააყოლეთ 1 ჩაის ჭიქა უცხიმო მაწონი ან 1 ჩაის ჭიქა ახალგამოწურული ხილის უშაქრო წვენი.

ვახშამი (18 საათი): რგოლებად დაჭერით 3 ცალი საშუალო ზომის მოხარშული კარტოფილი, 5-6 ღერი მწვანე ხახვი, 2 ცალი საშუალო ზომის პომიდორი, რამდენიმე ცალი სალათის ფოთოლი და 100 გრამი მოხარშული უცხიმო ხორცი. 1 სადილის კოვზი ვაშლის ძმარი და 3 სადილის კოვზი უცხიმო მაწონი ან იოგურტი აურიეთ და მოასხით სალათას. მარილი – გემოვნებით.

მეორე დღე

პირველი საუზმე (9 საათი): 1 ფინჯანი უშაქრო შავი ყავა, 1 ნაჭერი ცეხვილი შავი პური, 1 ჩაის კოვზი თაფლი.

მეორე საუზმე (12 საათი): 100 გრამი უცხიმო ხაჭო და 1 ჩაის ჭიქა მაწონი აურიეთ ერთმანეთში, 1 ნაჭერი ცეხვილი შავი პური, 1 ჩაის ჭიქა ხილის წვენი.

სადილი (15 საათი): 200 გრამი მოხარშული კარტოფილი დაჭერით რგოლებად. მოშუშეთ 100 გრამი საქონლის ხორცის ფარში და 1 თავი დაჭრილი ხახვი; ცალკე მოშუშეთ 2 ცალი რგოლებად დაჭრილი და სუნელებით შეზავებული პომიდორი. კარტოფილი, ფარში და პომიდორი ჩააწყვეთ ტაფაში ფენებად, მოაყარეთ მარილი გემოვნებით, მოასხით 1 ჩაის ჭიქა არამჟავე და უცხიმო მაწონში ათქვეფილი 1 კვერცხის გული და 10-15 წუთით შედგით ჰაერღუმელში. დააყოლეთ 1 ჩაის ჭიქა გაზგასული მინერალური წყალი.

ვახშამი (18 საათი): 150 გრამი მოხარშული კარტოფილი, 100 გრამი ყვავილოვანი კომბოსტო, 1 ცალი წვრილად დაჭრილი სტაფილო მოშუშეთ ცოტაოდენ ზეთში. მოასხით 200 მილილიტრი ქათმის ან საქონლის ხორცის ცხიმმოხდილი ბულიონი, წამოადუღეთ და შეაზავეთ მარილით. დააყოლეთ 1 ჩაის ჭიქა მაწონი ან მინერალური წყალი.

მესამე დღე

პირველი საუზმე (9 საათი): 1 ფინჯანი უშაქრო შავი ყავა ან 1 ჩაის ჭიქა მწვანე ჩაი, 1 ნაჭერი ცეხვილი შავი პური, 1 ჩაის კოვზი ჯემი.

მეორე საუზმე (12 საათი): 1 ჩაის ჭიქა ნაკლებშაქრიანი კაკაო, 2 ცალი ხაჭოიანი ბლინი, ან 100 გრამი მოხარშული წიწიბურა.

სადილი (15 საათი): რგოლებად დაჭერით 1 პატარა თავი ხახვი, 150 გრამი მოხარშული კარტოფილი, 2 ცალი საშუალო ზომის პომიდორი და ცოტაოდენ ზეთში მოშუშეთ. მოაყარეთ მარილი, წვრილად დაჭრილი კამა და ოხრახუში. ათქვიფეთ 2 ცალი კვერცხი ნახევარ ჩაის ჭიქა რძესთან ერთად, შეაზავეთ მარილით, მოასხით მოშუშულ კარტოფილსა და ზეთს და შედგით ჰაერღუმელში 10-15 წუთით. დააყოლეთ 1 ჩაის ჭიქა მაწონი.

ვახშამი (18 საათი): კუბიკებად დაჭერით 100 გრამი მოხარშული კარტოფილი, 100 გრამი მოწალული ბროკოლი, 100 გრამი ქათმის ან ინდაურის მკერდის ხორცი (მოხარშული), ნახევარ-ნახევარი კონა მწვანე ხახვი, კამა და ოხრახუში, 1 ცალი ბულგარული წიწაკა წვრილად დაჭერით და მოაყარეთ, დაახეხეთ 1 ცალი უმი სტაფილო და შეაზავეთ მარილითა და 2 სადილის კოვზი მაიონეზით. დააყოლეთ 1 ჩაის ჭიქა გაზგასული მინერალური წყალი ან პიტნის უშაქრო ჩაი (გაგრილებული).

წარმატებას გისურვებთ!