30 ივლისს, სასტუმრო „რედისონში“, ულამაზესი თინეიჯერი გოგონას გამოსავლენად ქართული ბომონდი შეიკრიბა. ღონისძიების ორგანიზატორები იყვნენ სამოდელო სააგენტო „კატრინი“ და მისი პრეზიდენტი – ეკა მგალობლიშვილი, რომელიც, ამავდროულად, არის საერთაშორისო ორგანიზაცია „ინტერმოდელ ინტერნეიშენელ გრუპის“ ერთადერთი ოფიციალური წარმომადგენელი საქართველოში, და წარმომადგენლობები ხუთი კონტინენტის ორმოცდარვა ქვეყანაში აქვს. თინეიჯერები მთელი ქვეყნის მასშტაბით შეირჩნენ, ფინალში კი მხოლოდ 23 გოგონა მონაწილეობდა. ჟიურიმ, რომლის შემადგენლობაშიც იყვნენ: ლელა წურწუმია, ბიჭოლა, ბაკურ ბაკურაძე, თიკო ნატროშვილი, კრისტი, ირმა შარიქაძე, თაკო მექვაბიძე და თავად ეკა მგალობლიშვილი, რომელიც თამუნა გომართელთან ერთად „მის თინეიჯერის“ ეროვნული დირექტორიც გახლავთ, გამარჯვებულად მარიამ დონაძე დაასახელეს. ულამაზესი თინეიჯერი, უამრავ სხვა პრიზთან ერთად, „ეკა თრეველისგან“ ხმელთაშუა ზღვის სანაპიროზე მოგზაურობით დააჯილდოეს.