ევროპამ ვუვუზელების აკრძალვა დაიწყო
მსოფლიოს საფეხბურთო ჩემპიონატს ვინც უყურა, დაგვეთანხმება, რომ მთელ ტურნირს ყურისწამღები ჭყვიტინი გასდევდა თან ფონად. ეგრეთ წოდებული ვუვუზელების ფონზე ფეხბურთელებს მოედანზე ერთმანეთის არ ესმოდათ და მალევე ითქვა, რომ ამ საჭყვიტინოს ევროპაც აიტაცებდა. ისე ყველაფერი აგიხდეთ, როგორც ეს ახდა და მართალია, რიგ ქვეყნებში ჩემპიონატები ჯერ არ დაწყებულა, ამხანაგურ მატჩებში ვუვუზელების გამოყენება აქტიურად დაიწყო და შედეგმაც არ დააყოვნა.
ჩეხეთის პარლამენტმა კანონი მიიღო და ვუვუზელები არა მარტო სტადიონზე, არამედ მთლიანად აიკრძალა. ანუ, მათი ჭყვიტინი არც ქალაქის ქუჩებში უნდა ისმოდეს. 300-ფუნტიანი ჯარიმები დააწესეს ორი ლონდონური კლუბის, „არსენალისა“ და „ტოტენჰემის“ მესვეურებმა. ამ ჯარიმებს ისინი გადაიხდიან, ვინც სტადიონზე ვუვუზელათი შევა. ანალოგიურის გაკეთებას მალე ყველა ინგლისური კლუბი აპირებს და დიდი ალბათობით, ვუვუზელების გაყიდვაც კი მალე აიკრძალება.