მას შემდეგ, რაც ინგლისის ნაკრები მსოფლიოს ჩემპიონატზე ჩაფლავდა, ფეხბურთელებმა დასასვენებლად მოიცალეს და ისეთ ადგილებს მიაშურეს, სადაც მათ ნაკლებად იცნობენ. მაგალითად, უეინ რუნიმ, რომელსაც მუნდიალის ბომბარდირობას უწინასწარმეტყველებდნენ და ერთი გოლიც ვერ გაიტანა, თავის ცოლთან, კოლინ მაკლაფლინთან ერთად გეზი ბარბადოსისკენ აიღო. სასტუმროში, სადაც წყვილია გაჩერებული, მილიონერები ცხოვრობენ და როგორც ირკვევა, ერთი დღე-ღამე რუნის სამი ათას ევრომდე უჯდება. ამას ემატება ორი მოსამსახურე, თან რომ იახლეს და ძიძა, რომელიც პატარა რუნის უვლის.

ჰოდა, მოდი და დაიგლიჯე ამის მერე ნერვები ინგლისელთა მარცხის გამო. თითოეული ფეხბურთელი დასვენებაში იმაზე ნაკლებს დახარჯავს, ვიდრე კვირაში იღებს და ეს ნაკლები, მინიმუმ, 50 ათასი გირვანქა იქნება.