მსოფლიო ეკონომიკურმა კრიზისმა საფრანგეთი აიძულა, გერმანიისთვის მიებაძა და მკაცრი ეკონომიის რეჟიმისთვის მიემართა. პარიზი და ბერლინი ერთობლივად ამზადებენ წინადადებებს ბრიუსელში წარსადგენად. ისინი მიზნად ისეთი კანონმდებლობის მიღებას ისახავენ, რომელიც სამუდამოდ აღკვეთდა საერთო ევროპული ვალუტის კრახის შესაძლებლობას. მომზადებულ წინადადებებს შორის დავალიანების მქონე სახელმწიფოების წინააღმდეგ საჯარიმო სანქციების შემოღებაცაა. საფრანგეთი, რომელიც ადრე გერმანიის მიდგომებს აკრიტიკებდა ეკონომიკასთან დაკავშირებით, დღესდღეობით მკაცრი საბიუჯეტო პოლიტიკის მომხრეთა ავანგარდში მოექცა. პარიზი, რომელიც ბოლო ათწლეულების განმავლობაში უპრობლემოდ ეგუებოდა საბიუჯეტო დეფიციტსა და ვალებს, კარდინალურ ცვლილებებს ახორციელებს თავის ეკონომიკურ პოლიტიკაში. საინტერესოა, რომ ამჟამად საფრანგეთის სახელმწიფო ვალი მისი მთლიანი შიდა პროდუქტის 83,6 პროცენტია, გერმანიისა კი – 78,8 პროცენტი. იმ შემთხვევაში, თუ ბერლინისა და პარიზის ინიციატივა წარმატებულად განხორციელდება, ევროპელებს ცხოვრების წესის შეცვლა და კრედიტებით ცხოვრების სტილზე უარის თქმა მოუწევთ.