იყო დიდძალი ქონების მემკვიდრე – აღარ არის მოდური თანამედროვე მსოფლიოში. დღევანდელი მილიარდერების უმეტესობამ დიდძალი კაპიტალი საკუთარი შრომით შექმნა და მათ არც ოჯახი და არც მომაკვდავი ნათესავების დატოვებული მილიონები დახმარებია. შემოგთავაზებთ იმ მილიარდერების ჩამონათვალს, რომლებმაც მილიარდიანი ქონების დაგროვება ნულიდან დაიწყეს.

ინგვარ კამპრადი – 23 მილიარდი ამერიკული დოლარი

ინგვარ კამპრადმა პირველი ფული ჯერ კიდევ პატარაობისას გამოიმუშავა, როდესაც ველოსიპედით ქუჩაში დასეირნობდა და თან ასანთს ყიდდა. შემდგომში მან გაზარდა გასაყიდი პროდუქციის ასორტიმენტი და, ასანთის გარდა, თევზის, საახალწლო სათამაშოების, ბურთულიანი კალმისტრებისა და ფანქრების გაყიდვა დაიწყო. მოგროვებული ფული 17 წლის კამპრადმა საკუთარი კომპანიის განვითარებაში ჩადო, რომელიც მოგვიანებით მსოფლიოში ცნობილ ბრენდად – „იკეად“ გადაიქცა. მილიარდიანი ქონების მიუხედავად, კამპრადი ცნობილია თავისი მოკრძალებული ცხოვრებით – იგი მხოლოდ ეკონომკლასით დაფრინავს, სადილობს იაფფასიან რესტორნებში, ხოლო ავეჯი მის სახლში მთლიანად „იკეადან“ არის.

ლი კა-შინი – 21,3 მილიარდი ამერიკული დოლარი

წარმოშობით ჩინელმა ლიმ, 1940 წელს მიატოვა სამშობლო და ჰონკონგში დაფუძნდა. მამის გარდაცვალების შემდეგ იგი ოჯახის ერთადერთ მარჩენლად იქცა. 14 წლის ასაკში იძულებული გახდა, მიეტოვებინა სკოლა და პლასტმასის ქარხანაში ემუშავა, სადაც დღეში 16 საათს ატარებდა. 1950 წელს ლიმ საკუთარი კომპანიის დაფუძნება განიზრახა და ნასესხები ფულით პლასტმასის პროდუქციის საწარმო – „ჩეუნგ კონგ ინდასთრისი“ დააარსა. ჟურნალი „ფორბსი“ ლი კა-შინს ერთ-ერთ ყველაზე მდიდარ ჩინელად მიიჩნევს.

რომან აბრამოვიჩი – 11,2 მილიარდი ამერიკული დოლარი

ბოლო პერიოდის ერთ-ერთი ყველაზე ცნობილი რუსი ოლიგარქი რომან აბრამოვიჩი, 4 წლის ასაკში დაობლდა და მას ბიძია და ბებია ზრდიდნენ. მისი ბიზნესკარიერა ჯერ კიდევ უნივერსიტეტში სწავლის პერიოდში დაიწყო, როდესაც მან პოლიმერისგან წარმოებული სათამაშოების კოოპერატივი გახსნა. აბრამოვიჩის საუკეთესო თვისებად დღესაც ითვლება ნიჭი იმისა, რომ იგი მუდამ საჭირო დროს საჭირო ადგილას ჩნდება.

შელდონ ადელსონი – 9,3 მილიარდი ამერიკული დოლარი

უბრალო ბოსტონელი ტაქსის მძღოლის შვილმა, შელდონ ადელსონმა, ბიზნესკარიერა 12 წლის ასაკში გაზეთების გაყიდვით დაიწყო. გარდა ამისა, სხვადასხვა დროს, ის საიპოთეკო ბროკერად და ფინანსურ კონსულტანტადაც მუშაობდა. დღესდღეობით კი იგი ამერიკის უმსხვილეს მაგნატად ითვლება, რომლის საკუთრებაში ლას-ვეგასის სასტუმროები და კაზინოებია.

ამანსიო

ორტეგა – 25 მილიონი ამერიკული დოლარი

რკინიგზის მუშის შვილმა, ამანსიო ორტეგამ, თავისი კარიერა ტანსაცმლის მაღაზიაში უბრალო კლერკობით დაიწყო. მოგვიანებით მან 25 დოლარით საკუთარი საქმე წამოიწყო და პირველი პერანგი შეკერა გასაყიდად. დღესდღეობით ორტეგა ბრენდ „ზარას“ მფლობელია, რომლის მაღაზიათა ქსელი მსოფლიოს 64 ქვეყანაშია გახსნილი და 3 ათასზე მეტ მაღაზიას მოიცავს.

კირკ კერკორიანი – 3,1 მილიარდი ამერიკული დოლარი

სომეხი ემიგრანტების შვილმა, კირკ კერკორიანმა, 8 წლის ასაკში მიატოვა სკოლა და კრივით დაინტერესდა. სპორტში კერკორიანმა მნიშვნელოვან წარმატებებს მიაღწია, მაგრამ, მიუხედავად ამისა, მისი შემდგომი პროფესია თვითმფრინავის პილოტირება გახდა. სწორედ ასეთი გზით მოხვდა ის პირველად ლას-ვეგასში, სადაც შეგროვილი 60 ათასი დოლარით მცირე ავიაკომპანია – „ტრანს ინტერნეიშენალი“ დააარსა, რომელიც მოგვიანებით 104 მილიონ დოლარად გაყიდა. კერკორიანი სხვადასხვა დროს ჰოლივუდურ სტუდიებს – „იუნაითედ არტისტსა“ და „მეტრო გოლდუინ მაიერსს “ ფლობდა. დღეს იგი ერთ-ერთ ყველაზე უხუცეს მილიარდერად მიიჩნევა.

მაიკ ჯაგტიანი – 2 მილიარდი

ამერიკული დოლარი

მაიკ ჯაგტინაი ოდესღაც ბუღალტრობასა და ლონდონში სწავლაზე ოცნებობდა, სადაც მოხვდა კიდეც, მაგრამ სწავლის ნაცვლად, სასტუმროში დამლაგებლად და ტაქსის მძღოლად მუშაობდა. 21 წლის ასაკში მაიკმა ოჯახი დაკარგა და სრულიად მარტო აღმოჩნდა ბაჰრეინში 6 ათასი დოლარით. ამ ფულით მან საბავშვო ტანსაცმლის მაღაზია გახსნა, რომელიც მოგვიანებით ახლო აღმოსავლეთში ერთ-ერთ ყველაზე მომგებიან ბიზნესად იქცა. სავაჭრო ნიშანი „ლენდმარკი“ აზიის კონტინენტზე 280 მაღაზიას აერთიანებს და ყოველწლიურად 650-მილიონიან მოგებას აძლევს ჯაგტიანს.

რიჩარდ დესმონდი – 2 მილიარდი ამერიკული დოლარი

მშობლების დაშორების შემდეგ რიჩარდი დედასთან ერთად დარჩა პატარა ბინაში, რომელიც ავტოფარეხის თავზე იყო განთავსებული. 14 წლისამ მან სკოლა მიატოვა, რომ დედას ფინანსურად დახმარებოდა და ადგილობრივი თეატრის გარდერობში გადავიდა სამუშაოდ, 21 წლის ასაკში დესმონდმა გაზეთ „ტომსონ ნიუსფეიფერში“ დაიწყო მუშაობა, ხოლო 22 წლისამ უკვე საკუთარი გაზეთის გამოცემა დაიწყო. დღეისთვის რიჩარდ დესმონდი ისეთი ცნობილი ჟურნალ-გაზეთების გამომცემელია, როგორებიცაა – „O.K.“, „დეილი ექსპრესი“, „დეილი სთარი“, „სანდეი ექსპრესი“.

ჯოან როულინგი – 1 მილიარდი ამერიკული დოლარი

თანამედროვეობის უცნობილესი მწერალი და ყველა ბავშვის სათაყვანებელი წიგნის – „ჰარი პოტერის“ ავტორი, ჯოან როულინგი, წლების განმავლობაში სიღარიბის ზღვარს მიღმა ცხოვრობდა. „პოტერის“ პირველი წიგნის დაწერის მომენტში როულინგი სახელმწიფოს დახმარების ამარა ცხოვრობდა, მაგრამ წიგნის პოპულარობამ და მწერლის აღიარებამ, პირველი წიგნის გამოსვლიდან 5 წლის შემდეგ, ჯოან როულინგს მილიონერის სტატუსი მიაკუთვნა.