ცრუ ახლომხედველობა მაშინ ვითარდება, როცა ადამიანს აქვს სამუშაოს ახლო მანძილზე კეთების ჩვევა. ასეთ დროს თვალის ბროლის სიმრუდეზე პასუხისმგებელი კუნთი გამუდმებით დაჭიმულია და ბროლს არასწორ ფორმას აძლევს და, რაც ყველაზე ცუდია, ეს კუნთი ძილის დროსაც არ დუნდება.

თვალი თანდათან ისე ეჩვევა შექმნილ სტრესულ სიტუაციას, რომ, შეიძლება, განვითარდეს ახლომხედველობის საწყისი ეტაპიც კი.

ასეთ დროს თვალის ვარჯიშები დაგეხმარებათ, კერძოდ:

* სწრაფად დახუჭეთ და გაახილეთ თვალები. ხშირად ახამხამეთ. იყავით ასეთ მდგომარეობაში მშვიდად, დაახლოებით ხუთი წამის განმავლობაში;

* მაგრად მოჭუტეთ თვალები რამდენიმე წამით, შემდეგ გაახილეთ და გაიხედეთ შორს;

* თანმიმდევრულად შეასრულეთ თვალის კაკლებით წრიული მოძრაობა ჯერ მარჯვნივ, მერე მარცხნივ. ვარჯიში 5-6-ჯერ მაინც გაიმეორეთ;

* საჩვენებელი თითებით ჩაიტარეთ ზედა და ქვედა ქუთუთოების მსუბუქი მასაჟი.