1 ივლისს საქართველოს პარლამენტის ეროვნულ ბიბლიოთეკაში გაიხსნა ტაო-კლარჯეთის ფოტოექსპედიციის მონაწილეთა გამოფენა. ექსპედიციაში მონაწილე 19 ფოტოგრაფს შორის იყვნენ მოყვარულებიც. მათი მიზანი იყო, გადაეღოთ ოშკისა და ხანძთის ტაძრების მდგომარეობა, რაც საშუალებას მოგვცემდა, ეს ფოტოები გასული წლების ფოტოებთან შეგვედარებინა და ტაძრების მდგომარეობა გაგვეგო.

გოგა ჩანადირი: სამწუხაროა, რომ ტაძრები ასეთ გაუარესებულ მდგომარეობაში ვნახეთ – ხანძთაზე გუმბათია ჩამონგრეული, ოშკზე კი დიდი მოცულობის ბარელიეფია ჩამოვარდნილი. ჩვენ სხვა ტაძრებიც მოვინახულეთ. განსაკუთრებით ცუდ მდგომარეობაშია ოთხთას ტაძარი. ეს ძეგლები სასწრაფო კონსერვაციას მოითხოვს, რათა არ მოხდეს მათი მდგომარეობის გაუარესება და სრული ნგრევა.

ფოტოები უფასოდ დაბეჭდა ფოტოცენტრმა – „დაბეჭდე ყველაფერი“, თავად ფოტოები კი ექსპედიციის წევრებმა ეროვნულ ბიბლიოთეკას საჩუქრად გადასცეს.