საქართველოს ფოტოგრაფთა ასოციაცია, „ტიფლის ივენთთან“ ერთად, „ფოტო ლაიფის“ დახმარებით, დაიწყო ინტერნეტ-რეალითი შოუ – „ფოტომანი 2010“, რომელიც, მართალია, უკვე მესამე წელია, რაც არსებობს, მაგრამ, წელს გაცილებით დიდი მასშტაბები შეიძინა. კონკურსი-შოუ ოთხ ეტაპად მიმდინარეობს და თითო ეტაპზე სხვადასხვა შესრულებული დავალების მიხედვით, ინტერნეტმომხმარებლის მიერ მინიჭებული შეფასებებითა და „ესემესებით“ ვლინდება მომდევნო ეტაპზე გადამსვლელი. „ესემეს“-ლიდერს „ბილაინი“ განსაკუთრებული პრიზით დააჯილდოებს. ფოტოკონკურსი სკანდალებისგან დაზღვეული არ არის. პირველი დავალება – „სხეულის მხილება“ – 24-დან რამდენიმე კონკურსანტმა თავისებურად გაიგო, ერთ-ერთმა ფოტოგრაფმა კი თავისი შიშველი სხეული გადაიღო. თუმცა, ეს დიდ ნოვაციად არავის მიუღია და ფოტოგრაფი მომდევნო ეტაპზე არ გადასულა. საბოლოო დავალება კი იქნება პაპარაცული ფოტოების გადაღება – ფინალისტები ცნობილ ადამიანებს „შეესევიან“ და საინტერესო, სკანდალური „ფაქტების“ დაფიქსირებას ეცდებიან. გამარჯვებულს „დიადემა“ საოცარ პრიზს უმზადებს, ეს არის ძვირფასი ლითონისგან შექმნილი ძველი, „გარმოშკიანი“ ფოტოაპარატი, რომელიც არ იქნება გარდამავალი და გამარჯვებულთან დარჩება.